سوال

"ریڈ بل "  ایک  انرجی ڈرنک ہے،  اس کے بارے  میں حکم مطلوب  ہے یہ حلال ہے یا حرام؟

جواب

ایک معتمد حلال تصدیقی  ادارے کے مطابق ریڈبُل (Red Bull) کا اوریجنل (Orignal) فلیور حلال ہے ، بقیہ فلیورز کے بارے میں جب تک معلومات اورتحقیقات مکمل نہ ہو جائیں، کوئی حکم نہیں لگایا جاسکتا۔

البتہ کھانے  پینے  کی وہ اشیاء جن کا حکم شریعت میں صراحتاً موجود نہ ہو ان کے بارے میں اصول یہ ہے کہ   جب تک ان میں کسی حرام چیز کے موجود ہونے  کی یقینی دلیل یا ظنِ غالب قائم نہ ہوجائے تب تک اس کو حرام نہیں کہا جائے گا، تاہم اگر  کسی بنیاد پر  اس میں شبہ پیدا ہوگیا ہو، لیکن یقینی یا ظن غالب کے درجے میں  نہ ہو تو  اس شبہ کی وجہ سے اس سے احتیاط کرنا چاہیے۔ کھانے پینے کی جو اشیاء غیر مسلم ممالک سے در آمد ہوں اور ان میں کسی وجہ سے حرام اجزاء کے ملنے کا شبہ ہو تو ان کے استعمال سے اجتناب ہی بہترہے۔

ارشاد  باری تعالی ہے:

{ وَيُحِلُّ لَهُمُ الطَّيِّبَاتِ وَيُحَرِّمُ عَلَيْهِمُ الْخَبَائِثَ }[الأعراف: 157]

دوسری جگہ ارشاد ہے:

{ قُلْ لَا أَجِدُ فِي مَا أُوحِيَ إِلَيَّ مُحَرَّمًا عَلَى طَاعِمٍ يَطْعَمُهُ إِلَّا أَنْ يَكُونَ مَيْتَةً أَوْ دَمًا مَسْفُوحًا أَوْ لَحْمَ خِنْزِيرٍ} [الأنعام: 145]

‘‘فتاوی شامی ’’ میں ہے:

"الأصل في الأشياء الإباحة."

(کتاب الاشربة.6/ 459 ط:سعيد)

فقط واللہ اعلم