سوال

قربانی کن پر فرض ہے؟

جواب

قربانی کے وجوب کی شرائط حسبِ ذیل ہیں:
(1) آزاد ہونا۔
(2) مسلمان ہونا۔

(3) بالغ ہونا۔

(4) ایام قربانی میں مقیم ہونا۔
(5) ایامِ قربانی میں بقدرِ نصاب مال  کا مالک ہونا۔ قربانی کے احکام میں نصاب کا مالک ہونے کا مطلب یہ ہے کہ عید الاضحیٰ کے دنوں میں جس شخص کے پاس ضرورت اور استعمال سے زائد کسی بھی قسم کا مال یا سامان اتنی مقدار میں ہو جس کی مالیت ساڑھے باون تولہ چاندی کی قیمت تک پہنچ جائے، اور یہ مقدار قرض اور دیگر واجب الادا اخراجات سے زائد ہو۔

لہذا  جس شخص میں بھی یہ تمام شرائط پائی جائیں اس پرقربانی واجب ہے، گھر کے صرف ایک فرد  (مثلًا سربراہ) کا قربانی کردینا کافی نہیں، بلکہ گھر کی خواتین  کے  پاس بھی اگر اتنا مال ہو تو ان پر بھی قربانی واجب ہوگی۔

''وإنما تجب علی حر مسلم مقیم موسرٍ''.

(مجمع الأنهر ۴؍۱۶۶)

''بأن ملك مائتي درهم أو عرضاً یساویها ...'' الخ

(الدرالمختار مع ردالمحتار، زکریا ۹؍۴۵۲، کراچی)

فقط واللہ اعلم