سوال

 کیا 78 کلومیٹر کی مسافت طے کرنے سے آدمی مسافر شرعی بن جاتا ہے، جب کہ ہمارے علاقے کہ امام صاحب کا کہنا ہے کہ مسافر شرعی کے  لیے  82 کلومیٹر کی مسافت کا ہونا ضروری ہے، اگر کم ہے تو وہ اتمام کرے گا قصر نہیں کرے گا ۔ تو اس بارے میں آپ راہ نمائی فرمائیں کہ کلو میٹر کے حساب سے اصل شرعی مقدار کیا ہوگی ؟

جواب

کلو  میٹر کے حساب سے سفر  شرعی  کی مسافت   سوا ستتر کلو میٹر  (77.24) ہے۔  میل کے  حساب  سے  اڑتالیس  میل اور   اصل  کے حساب سے تین دن صبح سے لے کر دوپہر تک معتدل سفرہے۔  مسافت کا اعتبار اپنے شہر / قصبے کی آبادی کے اختتام سے لے کر مطلوبہ شہر کی آبادی کی ابتدا تک ہے۔ آبادی سے نکل کر   اگر منفرد  یا امام ہے تو  قصر کرے گا اور  اگر   مقیم  امام کی اقتدا میں نماز پڑھے گا تو  پو ری نما ز پڑھے گا ۔

رد  المحتار میں ہے :

"(قوله:  علی المذهب) ... ثم اختلفو ا فقیل: أحد و عشرون، و قیل: ثمانیة عشر، و قیل: خمسة عشر، و الفتوى على الثانی؛ لأنه الأوسط ...  الخ 

(132/2 باب صلاۃ المسافر ، سعید) 

فقط واللہ اعلم