سوال

ایک دوکان کا سودا ہوگیا مکمل،  مگر قبضہ نہیں ملا اور رقم کی آہستہ ادائیگی شروع ہوگئی ہے،  اب اگر اس دوکان کا جو پہلا کرایہ دار تھا اس کا کرایہ کس کو ملے گا ؟ یعنی دوکان کے سابقہ مالک کوجس کی پہلی دوکان تھی  یا مشتری جس کے دوکان کا سودا ہوگیا ہے، لیکن قبضہ نہیں دیا۔

جواب

 اگر دوکان کا سودا کرنے کا مطلب دوکان قسطوں پر خریدی گئی ہے تو  ملحوظ رہے دوکان قسطوں پر خریدنے سے دوکان خریدار کی ملکیت میں آجاتی ہے،  اس کے لیے باقاعدہ غیرمنقولی اشیاء کی طرح قبضہ ضروری نہیں ہے، لہذا مذکورہ دوکان خریدنے کے بعد اس کے کرائے  کا حق دار خریدار ہے  سابقہ  مالک  (فروخت کنندہ) نہیں ہے۔

فتاوی شامی (الدر المختار ورد المحتار) میں ہے:

"وحكمه ثبوت الملك.

(قوله: وحكمه ثبوت الملك) أي في البدلين لكل منهما في بدل، وهذا حكمه الأصلي، والتابع وجوب تسليم المبيع والثمن، ووجوب استبراء الجارية على المشتري، وملك الاستمتاع بها، وثبوت الشفعة لو عقارا، وعتق المبيع لو محرما من البائع بحر، وصوابه من المشتري".

(کتاب البیوع، ج:4، ص:506، ط:ایج ایم سعید)

فقط واللہ اعلم