سوال

عرض یہ ہے کہ میرے والد مرحوم نے اپنی بڑی بہن سے مکان کا سودا کیا تھا،جس میں میرے والد کے ذمہ چھ لاکھ روپے ادا کرنے تھے،میرے والد مرحوم نے چار لاکھ روپے ادا کردیے تھے ،پھر ان کا انتقال ہوگیا ہے،اب دو لاکھ روپے باقی ہیں ۔

اب سوال یہ ہےاگر میں اپنی بڑی پھوپھی کو   بقیہ دولاکھ روپے  دیدوں جو میرے والد کے ذمہ تھے وہ دینے ہوں گے یا آج کے حساب سے  جو ویلیو بنتی ہےوہ دینے ہوں گے؟

جواب

صورتِ مسئولہ میں سائل کے والد کا اپنی بڑی بہن کے معاملہ کے بعد سائل کے والد کے ذمہ چھ لاکھ روپے تھے جن میں سے چار لاکھ روپے سائل کا والد اپنی حیات میں ادا کرچکاتھا،اور اب صرف دولاکھ روپے باقی ہیں جو کہ مرحوم پر قرض ہے،جسے سائل اپنے والد مرحوم کی طرف سے ادا کرنا چاہتاہے ،تو سائل کو صرف بقیہ دولاکھ روپے ہی ادا کرنے ہوں گے،اوراُس وقت کے دولاکھ روپے کی آج کے حساب سے جو ویلیو بنتی ہے وہ لازم نہیں ہے۔

تنقیح الفتاوی الحامدیہ میں ہے:

"فإذا كان ‌عقد ‌البيع ‌أو ‌القرض وقع على نوع معين منها كالريال الفرنجي مثلا فلا شبهة في أن الواجب دفع مثل ما وقع عليه البيع أو القرض."

[كتاب الصرف، ج:1، ص:281، ط:دار المعرفة]

فتاوی رحیمیہ میں ایک سوال کے جواب میں ہے:

"جس وقت ترکہ تقسیم کیا جائے اس وقت کی قیمت کا اعتبار ہوگا،یہ حقوق العباد کا معاملہ ہے، اس میں بہت احتیاط کی ضرورت ہے"۔

(کتاب المیراث ،283/10،ط:دار الاشاعت)

فقط واللہ اعلم