سوال

میں نے اپنے دوست  کے ساتھ ڈیل کی  جس میں میں نے اس کو کچھ رقم دی ، پھر اس نے وہی رقم رینٹ والے کو دیے  اور اپنا پلاٹ خالی کروا لیا ، اس کا وہی گھر پگڑی  پر تھا، پر اس نے مجھ سے اسٹامپ پیپر پر اگریمنٹ کیا کہ وہ میرے پورے پیسے ایک سال میں واپس دے دے گا ، اور پر مہینے اس گھر کا 15000 کرایہ  دے گا،تو کیا یہ سود ہے یا نہیں؟

جواب

واضح رہے کہ قرض دے کر اس پر مشروط اضافی رقم وصول کرناصریح سود ہے، اور سود از رؤے شرع حرام اور ناجائز ہے۔

لہذاصورتِ مسئولہ میں   سائل نے اپنے دوست کو جو کچھ رقم دی ہےاس رقم کی حیثیت قرض کی ہے اس قرض کے عوض کسی بھی قسم کی اضافی رقم وصول کرنا شرعاً سود ہے لہذا سائل صرف اپنی دی ہوئی رقم ہی وصول کرسکتا ہے خواہ قسطوں پر وصول کرے یا یکمشت وصول کرے مذکورہ کرایہ کے عنوان سے زائد رقم وصول کرنا ناجائز ہوگا۔

مشکاۃ المصابیح میں ہے:

"عن جابر، قال: «لعن رسول الله صلى الله عليه وسلم آكل الربا، ومؤكله، وكاتبه، وشاهديه» ، وقال: «هم سواء»." 

(  باب الربوا، ص: 243،  ط:قدیمی)

فتاوی شامی میں ہے:

"(قوله کل قرض جر نفعا حرام) ای اذا کان مشروطا کما علم مما نقله عن البحر."

(کتاب البیوع ، باب المرابحۃ والتولیۃ، فصل فی القرض،ج:5، ص:166، ط:سعید)

فقط واللہ اعلم