سوال

قرضہ ادا کرنے کے لیے بینک سے لون لینا کیسا ہے؟ جبکہ قرضہ اتارنے کی کوئی صورت نہ ہو۔

جواب

صورتِ مسئولہ میں کسی بھی بینک سے سودی قرضہ لینا حرام اور ناجائز ہے، سائل قرضہ ادا کرنے کے لئے یا تو رقم کا بندوبست کرلے یا کسی دوسرے سے قرضہ لیکر ادا کرلے، کیوں کہ بینک سود کا معاملہ کرتا ہے، اور سود کا لین دین شرعاً ا س قدر قبیح اور ناپسندیدہ ہے کہ اسے اللہ اور اس کے رسول  اللہ صلی اللہ علیہ وسلم کے ساتھ اعلان جنگ قرار دیاگیا ہے، قرآنِ کریم میں ہے:

"﴿ يَا أَيُّهَا الَّذِيْنَ آمَنُوا اتَّقُوا اللهَ  وَذَرُوْا مَا بَقِيَ مِنَ الرِّبَا إِنْ كُنْتُمْ مُؤْمِنِيْنَ فَإِنْ لَّمْ تَفْعَلُوْا فَأْذَنُوْا بِحَرْبٍ مِّنَ اللهِ وَرَسُوْلِه وَإِنْ تُبْتُمْ فَلَكُمْ رُءُوْسُ أَمْوَالِكُمْ لَاتَظْلِمُوْنَ وَلَا تُظْلَمُوْنَ وَإِنْ كَانَ ذُوْ عُسْرَةٍ فَنَظِرَة إِلٰى مَيْسَرَةٍ وَأَنْ تَصَدَّقُوْا خَيْر لَّكُمْ إِنْ كُنْتُمْ تَعْلَمُوْنَ﴾ 

ترجمہ: اے ایمان والو ! اللہ سے ڈرو اور جو کچھ سود کا بقایاہے اس کو چھوڑ دو اگر تم ایمان والے ہو، پھر اگرتم نہ کرو گے تو اشتہار سن لو جنگ کا اللہ کی طرف سے اور اس کے رسول کی طرف سے۔ اور اگر تم توبہ کرلوگے تو تم کو تمہارے اصل اموال مل جائیں گے، نہ تم کسی پر ظلم کرنے پاؤ گے اور نہ تم پر ظلم کرنے پائے گا، اور اگر تنگ دست ہو تو مہلت دینے کا حکم ہے آسودگی تک اور یہ کہ معاف ہی کردو  زیادہ بہتر ہے تمہارے لیے اگر تم کو خبر ہو۔

( سورۃ البقرۃ، رقم الآیۃ:278تا 280، ترجمہ: ازبیان القرآن للتھانویؒ)

فتاوی شامی(حاشیۃ ابن عابدین)  میں ہے:

"وفي الأشباه: كل قرض جر نفعاًحرام، فكره للمرتهن سكنى المرهونة بإذن الراهن".  

(کتاب البیوع، فصل فی القرض، مطلب کل قرض جر نفعا، ج:5، ص:166، ط:ایچ ایم سعید)

فقط واللہ اعلم