پھٹی ہوئی جائے نماز پر نماز پڑھنا کیسا ہے جب گھر میں نئی جائے نماز موجود ہوں؟ اگر درست نہیں تو پھٹے جائے نماز کو dispose off کرنے کا طریقہ کیا ہوگا؟
نماز ادا کرتے ہوئے، زینت اختیار کرنے کا اللہ رب العزت نے قرآنِ مجید میں حکم نازل فرمایا ہے، جس کا تقاضہ یہ ہے کہ نماز ادا کرتے ہوئے عمدہ لباس، و عمدہ جگہ کا انتخاب کرنا چاہیے، لہذا صورتِ مسئولہ میں بوسیدہ جائے نماز پر نماز ادا کرنے کے بجائے، عمدہ جائے نماز کا انتخاب کیا جائے، اگرچہ بوسیدہ جائے نماز پر ادا کردہ نماز صحیح قرار پائے گی، اور اگر اتنی پھٹی ہو کہ فرش براہِ راست نظر آتا ہو تو نماز صحیح ہونے کے لیے ضروری ہوگا کہ فرش پاک ہو۔
جو جائے نماز پھٹ گئی ہو اسے تلف کرنے کے بجائے کسی دوسرے قابلِ احترام کام میں استعمال کیا جاسکتا ہے، اس میں کوئی حرج نہیں، اور اگر بالکل استعمال کے قابل نہ ہو تو اسے بوسیدہ کپڑوں کے ساتھ ضائع کیا جا سکتا ہے، کوئی مخصوص طریقہ شریعتِ مطہرہ نے اس حوالے سے مقرر نہیں کیا ہے۔ فقط واللہ اعلم
فتوی نمبر : 144205200384
دارالافتاء : جامعہ علوم اسلامیہ علامہ محمد یوسف بنوری ٹاؤن