حضرت مولانا اشرف علی تھانوی رحمہ اللہ تعالی نے کامل پیر کی علامات بتلاتے ہوئے لکھا ہے کہ:

"1. وہ پیر دین کے مسئلےجانتا ہو، شرع سے ناواقف نہ ہو۔

2. اس میں کوئی بات خلافِ شرع نہ ہو۔

3. کمانے کھانے کے لیے پیری مریدی نہ کرتا ہو۔

4. کسی ایسے بزرگ کا مرید ہو جس کو اکثر اچھے لوگ بزرگ سمجھتے ہوں۔

5. اس پیر کو بھی اچھے لوگ اچھا کہتے ہوں۔

6.اس کی تعلیم میں یہ اثر ہو کہ دین کی محبت اور شوق پیدا ہوجائے، یہ بات اس کے اور مریدوں کا حال دیکھنے سے معلوم ہوجائے گی، اگر دس مریدوں میں پانچ چھ مرید بھی اچھے ہوں تو سمجھو کہ یہ پیر تاثیر والا ہے، اور ایک آدھ مرید کے بُرا ہونے سے شبہ مت کرو۔ اور تم نے جو سنا ہوگا کہ بزرگوں میں تاثیر ہوتی ہے وہ تاثیر یہی ہے۔ اور دوسری تاثیروں کو مت دیکھنا کہ وہ جو کچھ کہہ دیتے ہیں اسی طرح ہوتا ہے، وہ ایک چھو کردیتے ہیں تو بیماری جاتی رہتی ہے، وہ جس کام کے لیے تعویذ دیتے ہیں وہ کام مرضی کے موافق ہوجاتا ہے، وہ ایسی توجہ دیتے ہیں کہ آدمی لوٹ پوٹ ہوجاتا ہے۔ ان تاثیروں سے کبھی دھوکا مت کھانا۔

7. اس پیر میں یہ بات ہو کہ دین کی نصیحت کرنے میں مریدوں کا لحاظ ملاحظہ نہ کرتا ہو، بے جا بات سے روک دیتا ہو۔"

(ماخوذ از:بہشتی زیور حصہ ہفتم، ص:377، 378، ط : دارالاشاعت)