سوال

عورت پر حج فرض ہے، لیکن محرم کا خرچہ نہیں ہے، تو کیا وہ ابھی عمرہ کر لے اور پھر جب بعد میں اس کے پاس اپنا اور محرم کا زاد راہ اکٹھا ہو جائے تو پھر وہ حج کر لے، کیا ایسا کر سکتے ہیں؟

جواب

واضح رہے کہ عورت پر حج فرض ہونے کے بعد ادا کرنا لازم  ہونے کے لیے دیگر شرائط کے ساتھ ایک شرط یہ بھی ہے کہ اُس کے ساتھ حج کرنے کے لیے محرم بھی  موجود ہو، اگر عورت  مال دار ہو اور اس کا شوہر یا کوئی محرم نہ ہو  یا محرم ہو  مگر محرم کے اخراجات برداشت نہ  کرسکتی  ہو تو  ایسی عورت پر حج فرض کی ادائیگی لازم نہیں ہوگی،  اس کے لیے شرعی حکم یہ ہے کہ وہ انتظار کرتی رہے، تاآں کہ محرم کا بندوبست ہوجائے یا محرم کے اخراجات کا بندوبست ہوجائے۔ اگر زندگی بھر   بندوبست نہ ہوسکے تو اس کے لیے ضروری ہے کہ مرنے سے قبل حجِ  بدل کی وصیت کرجائے، تاکہ لواحقین حج بدل کرسکیں۔

باقی اگر مذکورہ خاتون ابھی عمرہ کرنا چاہتی ہیں تو کر سکتی ہیں، لیکن عمرہ کے سفر کے لیے بھی محرم کا ساتھ ہونا ضروری ہے، عورت کے لیے تنہا سفرِ شرعی کرنا ممنوع ہے۔

    فتاویٰ هنديه میں ہے:

"(ومنها ‌المحرم ‌للمرأة) شابة كانت أو عجوزا إذا كانت بينها وبين مكة مسيرة ثلاثة أيام هكذا في المحيط، وإن كان أقل من ذلك حجت بغير محرم كذا في البدائع."

(کتاب المناسک، الباب الاول، جلد:1، صفحہ: 219، طبع: دار الفکر)

فقط واللہ اعلم