سوال

نماز میں خاتون  مرد سے آگے یا اس کے برابر  میں بائیں یا دائیں جانب کھڑی ہوسکتی ہے، اگر کھڑی ہوجائے تو مرد کی نماز کا کیا حکم ہوگا؟،براہِ کرم اس حوالہ سے رہنمائی فرمائیں۔

جواب

صورتِ مسئولہ میں  جماعت کی نماز کے دوران عورت مرد سے آگے یا اس کے برابر میں دائیں یا بائیں جانب کھڑی نہیں ہوسکتی، اگر اس طرح کھڑی ہوگئی تو مرد کی نماز فاسد ہو جائے گی اور انفرادی نماز پڑھنے کی صورت میں مرد کی نماز مکروہ ہوگی، فاسد نہیں ہوگی، مزید وضاحت یہ ہے کہ اگر ایک ہی صف میں کوئی عورت  کسی مردکے دائیں بائیں یا پیچھے اس کی سیدھ میں نماز پڑھے اور وہاں درج ذیل شرائط پائی جائیں تو مرد کی نماز فاسد ہوجائے گی ، وہ شرائط مندرجہ ذیل  ہیں :

(1):   وہ عورت مشتہاۃ ہو، یعنی  ہم بستری کے قابل ہو خواہ بالغ ہو یا نہ ہو، بوڑھی ہو یا محرم، سب کا حکم یہی ہے۔

(2):  دونوں نماز میں ہوں، یعنی  ایسا نہ ہو کہ ایک نماز میں ہے اور دوسرا نماز میں نہیں ہے۔

(3):  مرد کی پنڈلی، ٹخنہ  یا بدن کا کوئی بھی عضو عورت کے کسی عضو کے مقابلہ میں آرہا ہو۔

(4) : یہ سامنا کم از کم ایک رکن (تین تسبیح پڑھنے کے بقدر) تک برقرار رہا ہو۔

(5) : یہ اشتراک مطلق نماز میں پایا جائے، یعنی نمازِ جنازہ کا یہ حکم نہیں ہے۔

(6):   دونوں کی نماز ایک ہی قسم کی ہو، یعنی  مرد وعورت دونوں ایک ہی امام کی اقتدا میں نماز پڑھ رہے ہوں۔

(7):  تحریمہ دونوں کی ایک ہو،  یعنی برابر نماز پڑھنے والی عورت نے برابر والے مرد کی اقتدا  کی ہو یا دونوں نے کسی تیسرے آدمی کی اقتدا کی ہو۔

(8):  عورت میں  نماز صحیح ہونے کی شرائط موجود ہوں،  یعنی  عورت پاگل یا حیض ونفاس کی حالت میں  نہ ہو۔

(9):   مرد وعورت کے نماز پڑھنے کی جگہ سطح کے اعتبار سے برابر ہو، یعنی اگر سطح میں آدمی کے قد کے بقدر فرق ہو، تو محاذات کا حکم نہ ہوگا۔

(10): دونوں کے درمیان کوئی حائل نہ ہو،  یعنی دونوں کے درمیان ایک انگلی کے برابر موٹی اور سترے کی مقدار اونچی کوئی چیز یا  ایک آدمی کے کھڑے ہونے کے بقدر فاصلہ نہ ہو۔

(11):  اور امام نے مرد کے برابر میں کھڑی ہوئی عورت کی امامت کی نیت بھی کی ہو۔

  اگر مذکورہ شرائط پائی جائیں تو ایک عورت کی وجہ سے تین مردوں ( دائیں بائیں جانب والے دو مردوں کی اور عورت کی سیدھ میں پیچھے ایک مرد) کی نماز فاسد  ہوجائے گی۔

فتاوی عالمگیری(الفتاویٰ الہندیۃ)  میں ہے:

"محاذاة المرأة الرجل مفسدة لصلاته ولها شرائط:

(منها) أن تكون المحاذية مشتهاةً تصلح للجماع ولا عبرة للسن وهو الأصح ....

(ومنها) أن تكون الصلاة مطلقةً وهي التي لها ركوع وسجود....

(ومنها) أن تكون الصلاة مشتركةً تحريمةً وأداءً ....

(ومنها) أن يكونا في مكان واحد...

(ومنها) أن يكونا بلا حائل ... وأدنى الحائل قدر مؤخر الرحل وغلظه غلظ الأصبع والفرجة تقوم مقام الحائل وأدناه قدر ما يقوم فيه الرجل، كذا في التبيين.

(ومنها) أن تكون ممن تصح منها الصلاة....

(ومنها) أن ينوي الإمام إمامتها أو إمامة النساء وقت الشروع ...

(ومنها) أن تكون المحاذاة في ركن كامل....

(ومنها) أن تكون جهتهما متحدة ..... ثم المرأة الواحدة تفسد صلاة ثلاثة واحد عن يمينها وآخر عن يسارها وآخر خلفها ولا تفسد أكثر من ذلك. هكذا في التبيين.وعليه الفتوى. كذا في التتارخانية والمرأتان صلاة أربعة واحد عن يمينهما وآخر عن يسارهما واثنان خلفهما بحذائهما ،وإن كن ثلاثا أفسدت صلاة واحد عن يمينهن وآخر عن يسارهن وثلاثة خلفهن إلى آخر الصفوف وهذا جواب الظاهر. هكذا في التبيين".

( کتاب الصلاۃ، الباب الخامس فی الامامة، الفصل  الخامس فی بیان مقام الامام والماموم، ج:1، ص:89،  ط:مکتبہ رشیدیہ)

فقط واللہ اعلم