سوال

اگر مغرب کا وقت داخل ہوجائے اور مغرب کی اذان نہ ہوئی ہو تو کیا نماز ادا کی جاسکتی ہے؟

جواب

نماز کا وقت داخل ہوتے ہی نماز پڑھنا جائز ہوجاتا ہے، اذان تو نماز کا وقت داخل ہونے کے اعلان کے لیے اور باجماعت نماز کی طرف دعوت دینے کے لیے ہوتی ہے، اس لیے خواتین اپنے گھروں پر نماز کا وقت داخل ہوتے ہی نماز پڑھ سکتی ہیں چاہے اذان نہ ہوئی ہو، لیکن مردوں کو تو جماعت کے ساتھ نماز پڑھنا سنتِ مؤکدہ اور واجب کے درجہ میں ہے، اس لیے مرد اگر بلا کسی عذر کے نماز کا وقت ہوتے ہی اذان سے پہلے گھر میں اپنی انفرادی نماز پڑھ لے تو اس کی نماز ادا تو ہوجائے گی لیکن بلاعذر جماعت چھوڑنے کا گناہ ملے گا، البتہ اگر کوئی شرعی عذر (بیماری، سفر یا شدید بارش وغیرہ) ہو پھر گناہ نہیں ملے گا۔

فتاوی شامی میں ہے:

"الأصل في مشروعية الأذان الإعلام بدخول الوقت."

(كتاب الصلاة، باب الأذان، ج:1، ص:383، ط:سعيد)

وفیہ ایضاً:

"(والجماعة سنة مؤكدة للرجال) قال الزاهدي: أرادوا بالتأكيد الوجوب إلا في جمعة وعيد فشرط".

(كتاب الصلاة، باب الإمامة، ج:1، ص:552، ط:سعيد)

فقط والله اعلم