سوال

نکاح نامہ میں ایک  حصہ  (سیکشن 18 تا 20 ) ایسا حصہ ہوتا ہے جو اکثر کاٹ دیا جاتا ہے، کیوں کہ یہ حکومت کی طرف سے دیا گیا حق ہے اور اگر میاں بیوی اس پر راضی ہوں تو کیا اسے برقرار رکھا جاسکتا ہے؟ کیا اس میں کوئی ایسی چیز ہے جو شرعی طور پر ناجائز ہو  جس  کی وجہ سے اسے کاٹا جاتا ہے؟

جواب

نکاح نامے  میں ذکر کردہ شق  18 :آیا شوہر نے بیوی کو طلاق کا حق تفویض کردیا  ہے؟ اگر کردیا ہے تو کون سی شرائط کے ساتھ؟

یہ شرط شرعًا درست ہے، نکاح میں یہ شرط  باہمی رضامندی سے  رکھی  جاسکتی ہے،البتہ اس کی مختلف صورتیں ہیں اور الفاظ کے فرق سے بھی حکم بدلتا ہے، اس کی تفصیل درج ذیل لنک پرجامعہ کے فتوی میں  ملاحظہ کی جاسکتی ہے۔

عورت کاطلاق کا حق لینا

اور شق نمبر 19 : آیا شوہر  کے طلاق کے حق پر کسی قسم کی پابندی لگائی گئی ہے :

طلاق دینا شوہر کا حق ہے، طلاق دینے پر کسی قسم کا جرمانہ یا مالی پابندی لگانا جائز نہیں ہے، البتہ جائز اقدامات کے ذریعے شوہر کو پابند   کیا جاسکتا ہے کہ وہ بلاضرورت طلاق نہ دے۔

اور شق نمبر 20: آیا شادی کے موقع پر مہر ونان نفقہ وغیرہ سے متعلق کوئی  دستاویز تیار کی گئی ہے ۔۔۔ الخ

اس کا حکم یہ ہے کہ باہمی رضامندی سے اس کو طے کیا جاسکتا ہے۔

باقی ان شقوں کو عمومًا اس لیے کاٹ دیا جاتا ہے کہ جانبین کی رضامندی اور اعتماد سے رشتہ طے پاتاہے، اور  پہلے ہی دونوں خاندان ایک دوسرے کو سمجھ لیتے ہیں، جب کہ ایسی شرائط وہاں رکھی جاتی ہیں جہاں بداعتمادی کی کوئی وجہ یا غیر یقینی کی کیفیت ہو، الغرض یہ شقیں پیش بندی کے طور پر ہوتی ہیں، لازمی طور پر حل کرنے کے لیے نہیں۔ فقط واللہ اعلم