سوال

زید نے اپنی زوجہ کو طلاق رجعی دی،عدّت گزرنے پر نکاح کرنا چاہا ،تو عورت نے اسے اپنے نکاح کا وکیل بنایا اور آگے کسی دوسرے کو بھی وکیل بنانے کی اجازت دی ، زید نے اپنے ایک دوست کو فون کیا اور فون پر اسے اپنا اور اپنی زوجہ کا وکیل بالنکاح بنا دیا اوراس دوست نے اسی وقت دو گواہوں کے سامنے ان کا نکاح کر دیا ،جب کہ فون پر زید کو اس کے نکاح کروانے کی آواز آتی رہی ،تو کیا اس طرح زید کا اپنی مطلقہ سےدوبارہ  نکاح ہوگیا یا نہیں؟

جواب

صورتِ مسئولہ میں جب زید نے اپنی مطلّقہ سے دوبارہ نکاح کرنا چاہاتو مطلقہ نے زید کو اپنے نکاح کا وکیل بنایااور آگے  کسی اورکو وکیل بنانے کی بھی اجازت دے دی،چنانچہ زید نے اپنے دوست کو اپنی او راپنی مطلقہ کی طرف سے   وکیل بنایا او ر دوست نے جانبین کے وکیل  کی حیثیت سے  مجلسِ نکاح میں دوگواہوں کی موجودگی میں نکاح کرادیا تو ایسی صورت میں  مذکورہ نکاح منعقد ہوگیا۔

الدر مع الرد میں ہے:

"(ويتولّى طرفي النكاح واحدٌ) بإيجابٍ يقوم مقام القبول في خمس صورٍ كأن كان وليّاً أو وكيلاً من الجانبين أو أصيلاً من جانب ووكيلاً أو وليّاً من آخر، أو وليّاً من جانب وكيلا من آخر كزوجتُ بنتي من موكّلي.... (قوله: وليّاً أو وكيلاً من الجانبين) كزوّجتُ ابني بنتَ أخي، أو زوّجتُ موكّلي فلاناً موكّلتي فلانةً".

(الدر مع الرد،کتاب النکاح، باب الکفاءۃ،ج:۳،ص:۹۶۔۹۷،ط:سعید)

فقط واللہ اعلم