سوال

نکاح اگر پہلے  ہوجائے تو  شادی  کے  دن دولہا کے ساتھ بیٹھنا کیسا ہے؟ جہاں  رسمیں ہوں اور دلہن کے گھر کی دوسری عورتیں موجود ہوں؟

جواب

نکاح کے بعد  دلہا اور دلہن کا رخصتی سے قبل ساتھ بیٹھنا جائز ہے اور ان کا آپس میں شرعًا  کوئی پردہ نہیں ہے، لیکن اس نکاح ہونے  سے دلہا کے لیے ساس کے علاوہ  دلہن کے خاندان  کی دیگر عورتیں نامحرم ہی رہتی ہیں، اسی طرح اپنے خاندان کی جو نامحرم عورتیں ہیں ان سے بھی بدستور پردہ ہے، اور جو رسمیں غیر شرعی ہوں وہ بھی ناجائز ہیں، لہذا  دیگر نامحرم عورتوں کی موجودگی میں دلہا کا دلہن کے  ساتھ نامحرم خواتین اور غیر شرعی رسموں کی مجلس میں  بیٹھنا جائز نہیں ہے۔

البتہ اگر خاندان کی ایسی عورتیں موجود ہوں جن سے دلہا کا پردہ نہیں ہے، اور وہاں ناجائز رسومات بھی نہ ہوں تو دلہا دلہن کا ساتھ بیٹھنا منع نہیں ہوگا۔ فقط واللہ اعلم