سوال

نماز تہجد سنت ہے یا نفل ؟ حنفیہ کا مفتی بہ قول کیا ہے ؟

جواب

نماز تہجد کے بارے میں بعض علماءنے سنتِ مؤکدہ ہونے کا قول کیا ہے،  مگر اکثر علماء کے نزدیک نماز تہجد  امت کے حق میں نفل ہے ۔

امداد الاحکام میں ہے:

’’نماز تہجد سنت مؤکدہ ہے یا مستحب؟

سوال :ایک لڑکے کانام حبیب اللہ ہے، مالابدمنہ اردو پڑھتاتھا، ایک جگہ لکھا ہے ، کہ نماز تہجد سنتِ مؤکدہ ہے، اسی درمیان میں ایک حافظ صاحب تشریف لائے، اور کہنے لگے،کہ سنتِ مؤکدہ نہیں بلکہ نفل ہے، اور تم کو معلوم نہیں، لڑکے نے کہا کہ جناب حافظ صاحب!ہم نے تنبیہ الغافلین میں بھی یہی پڑھا ہے، کہ نماز تہجد سنتِ مؤکدہ ہے، اور مالابدمنہ میں بھی موجود ہے، بس جناب حافظ صاحب بہت غصہ ہوکر بولے، کہ تم کو کیا معلوم، اور کون ہمارے میں اتنا مسئلہ جانتاہے،اس بستی میں ؟تو لڑکے نے کہا کہ ہم کو تو بس یہی کتاب بس ہے، تو فوراً حافظ صاحب نےکہا کہ اس کتاب پدوڑی کو نہیں مانتے ۔

الجواب: نماز تہجد کے بارے میں علماء کا اختلاف ہے، بعض کے نزدیک سنت مؤکدہ ہے،بدلیل مواظبته صلی اللہ علیه وسلم علیها من غیر افتراض علیه،قال فی رد المحتار: ومفادہ اعتماد السنیة فی حقنا لأنه صلی اللہ علیه وسلم واظب علیه بعد نسخ فرضیته. وکذا قال فی الحلیة: الأشبه أنه سنة،(ص:616،ج:1)،اور بعض كے نزديك مستحب هے، وحملوا مواظبته صلى الله عليه وسلم على كونها فريضة،مختصة به،اور اکثر علماء کا قول یہی ہے،کہ امت کے حق میں نماز تہجد مستحب ہے، سنتِ مؤکدہ نہیں ،قال فی مراقي الفلاح،وأکثر المتون علیه ،وندب صلوۃ اللیل خصوصاً آخرہ کما ذکرناہ،اور اس عبد ضعیف کا خیال یہ ہے کہ ابتداءً تو صلوۃ تہجد مستحب ہی ہے، لیکن بعد شروع کردینے کے اور عادی ہوجانے کے اس پر مواظبت کرنا سنت مؤکدہ ہے،ودلیله قوله صلی اللہ علیه وسلم لابن عمر یا عبداللہ لاتکن مثل فلان کان یقوم اللیل ثم ترك، رواہ البخاري،فی کتاب التهجد،چوں کہ اس مسئلہ میں اختلاف ہے، اس لیے  قاضی ثنا ء اللہ صاحب نے جو بڑےمحقق ومحدث عالم ہیں، سنت مؤکدہ ہونے کو اختیار کیاہے...ملخصاً۔‘‘

(کتاب الصلاۃ،ج:1،ص:605،ط:مکتبہ دارالعلوم کراچی) 

فقط واللہ اعلم