سوال

کیا ایسی کوئی روایت ہے جس میں حضور اکرم صلی وسلم نے مرد کو اپنی بیوی کے پاس جانے کا حکم دیا اس صورت میں اگر وہ کسی نامحرم کو دیکھے؛ کیوں کہ اس عورت کے پاس وہ ہی ہے جو اس کی بیوی کے پاس ہے؟

جواب

مذکورہ روایت مشکاۃ شریف میں ہے، مکمل روایت یہ ہے:

"عن ابن مسعود قال: رأى رسول الله صلى الله عليه وسلم امرأةً فأعجبته فأتى سودة وهي تصنع طيبًا وعندها نساء، فأخلينه فقضى حاجته، ثم قال: «أيما رجل رأى امرأةً تعجبه فليقم إلى أهله فإنّ معها مثل الذي معها» . رواه الدارمي." (مشكاة المصابيح 2/ 933المكتب الإسلامي - بيروت)

ترجمہ: حضرت ابن مسعود کہتے ہیں کہ ایک دن رسول کریم صلی اللہ علیہ وسلم کی نظر ایک عورت پر پڑی تو وہ آپ صلی اللہ علیہ وسلم کو اچھی لگی، چناں چہ آپ صلی اللہ علیہ وسلم فورًا ام المؤمنین حضرت سودہ کے پاس تشریف لائے وہ اس وقت خوشبو تیار کر رہی تھیں اور چند عورتیں ان کے پاس بیٹھی ہوئی تھیں ان عورتوں نے خلوت کر دی (یعنی حضرت سودہ کے پاس سے اٹھ کر باہر آگئیں) پھر آپ صلی اللہ علیہ وسلم نے اپنی ضرورت پوری کی (یعنی حضرت سودہ سے ہم بستری فرمائی ) اور فرمایا کہ جس مرد کی کسی ایسی عورت پر نظرپڑ جائے جو اسے اچھی لگے تو اسے چاہیے کہ وہ فورًا اپنی بیوی کے پاس چلا جائے؛ کیوں کہ اس کی بیوی کے پاس بھی وہی چیز ہے جو اس عورت کے پاس ہے۔

فقط واللہ اعلم