سوال

ہماری مسجد میں نماز کے دوران یعنی جب امام صاحب سلام پھیرتے ہیں تو اس کی بعد امام صاحب و مقتدی زور زور سے آیت الکرسی پڑھتے ہیں  اور فجر نماز میں بھی یہی دستور ہے،  کیا زور زور سے آیت الکرسی پڑھنا درست ہے؟

جواب

فرض نمازوں کے بعد آیۃ الکرسی پڑھنا   مستحب ہے، حدیث شریف میں نماز کے بعد اس کے پڑھنے کی فضیلت وارد ہوئی ہے،لیکن اس طرح زور سے پڑھنا جس سے نمازیوں کو تکلیف ہوتی ہو جائز نہیں ہے۔لہذا آیت الکرسی اور دیگر اذکار  آہستہ آواز سے کہے جائیں۔

سنن الکبری للنسائی میں ہے:

"من قرأ آية الكرسي في دبر كل صلاة مكتوبة لم يمنعه من دخول الجنة إلا أن يموت."

(رقم الحدیث: 9848، 44/9، ط: مؤسسة الرسالة)

"ترجمہ: جو شخص ہر فرض نماز کے بعد آیت الکرسی پڑھے، تو اس کے اور جنت کے درمیان صرف موت حائل ہے۔ (سنن الکبری للنسائی)"

فتاوی شامی میں ہے:

"وفي حاشية الحموي عن الإمام الشعراني: أجمع العلماء سلفا وخلفا على استحباب ذكر الجماعة في المساجد وغيرها إلا أن يشوش جهرهم على نائم أو مصل أو قارئ إلخ"

(کتاب الصلوۃ ، باب مایفسد الصلوۃ و مایکرہ فیها، ج:1، ص:669، ط: سعید)

فقط واللہ اعلم