سوال

 کیا نیچے ذکر کردہ الفاظ میں نعت پڑھنا صحیح ہے؟ کیا آپ صلی اللہ علیہ وسلم کو ’’تیری‘‘   کہنا خلاف ِتعظیم نہیں ہے؟ تو نے اتنا بھر دیا ہے کشکول بھرتے بھرتے کیا شعر کے یہ الفاظ موہوم بالشرک نہیں ہے؟ 

نعت ِ رسول ِ کریم صلی اللہ علیہ وسلم :

میری بات بن گئی ہے تیری بات کرتے کرتے

تیرے شہر میں میں آؤں تیری نعت پڑھتے پڑھتے

تیرے عشق کی بدولت مُجھے زندگی مِلی ہے

مُجھے موت آقا آئے تیرا ذکر کرتے کرتے

کِسی چیز کی طلب ہے نہ ہے آرزو بھی کوئی

تو نے اتنا بھر دیا ہے کشکول بھرتے بھرتے

میرے سونے سونے گھر میں کبھی رونقیں عطا ہوں میں

دیوانہ ہو گیا ہوں تیری راہ تکتے تکتے

جواب

واضح رہے کہ بے ادبی اور خلاف تعظیم کا تعلق اہلِ  لسان کے عرف سے ہوتا ہے ،نعتوں میں آپ ﷺ کے حق میں ’’تیرا ‘‘ یا’’ تیری ‘‘ کے الفاظ  کبھی ضرورتِ شعری یا اوزان وغیرہ کی رعایت  کی وجہ سے  استعمال ہوتے ہیں  اور بعض اوقات ان الفاظ میں زیادہ محبت اور اپنائیت ہوتی ہے، لہٰذا  اس کو  بے ادبی  نہیں سمجھا جاتا ۔

جامعہ کے سابقہ فتاویٰ میں سے ایک سوال و جواب اس مناسبت سے نقل کیا جاتاہے:

’’سوال:

ہم اللہ تعالی کو جب پکارتے ہیں تو کبھی "تو" کہہ کر پکارتے ہیں، جب کہ ہم کسی افسر کو پکارتے ہیں تو "جناب" یا "آپ" کہہ کر پکارتے ہیں، تو اس میں کوئی بے ادبی تو نہیں ہے؟

مستفتی: عبدالرحمان، اسحاق آباد، کراچی

جواب:

اللہ تعالی کو جو زبان سب سے زیادہ پسند ہے وہ عربی زبان ہے، یہی قرآن کریم کی زبان ہے، یہی خاتم الانبیاء محمد رسول اللہ ﷺ کی زبان ہے، اور یہی آخرت میں جنت کی زبان ہے۔

اور عربی زبان میں حق تعالی جل مجدہ نے جو الفاظ پکارنے اور بلانے کے لیے پسند فرمائے ہیں ان میں "أنت" کا لفظ ہے، اور انبیاء علیہم الصلاۃ و السلام نے حق تعالی کو لفظ "أنت" کے ساتھ پکاراہے، اور اللہ تعالی سے عاجزی اور انکساری کے ساتھ جو دعائیں مانگی ہیں وہ "انت" کے ساتھ مانگی ہیں، جیساکہ {لا إلٰه إلا أنت سبحٰنك إني كنت من الظالمین} [ الانبیاء: 87]

"أنت"  کا اصل ترجمہ "تو"  آتاہے، اور اردو زبان میں اس واسطے اگر اللہ تعالی کو "تو" کہہ کر پکارے تو بالکل صحیح ہے، اور اصل کلام عربی کے مطابق ہے، اور اس میں بھی عاجزی اور نکساری ظاہر ہوتی ہے، اور اس سے اللہ تعالیٰ سے قرب اور نزدیکی کی کیفیت پیدا ہوتی ہے، بخلاف لفظِ آپ کے، اس میں دوری اور اجنبیت ہے، پھر یہ ہماری اپنی زبان کا فرق ہے کہ لفظِ آپ سے تعظیم ہوتی ہے اور لفظِ تو سے بے تعظیمی؛ لہٰذا اپنی زبان کا فرق اپنے لوگوں میں تو ویسے استعمال کیا جائے جیساکہ عرف ہے کہ بڑے کے لیے آپ اور چھوٹے کے لیے تو یا تم، لیکن اللہ تعالی کے لیے استعمال کیا جائے تو یہ صرف "انت" کا ترجمہ ہے، اور اس میں کوئی بے ادبی نہیں، اللہ تعالی کی شان میں اسی کی اصطلاح ہے، اور بندوں کے لیے بندوں والی اصطلاح ہے۔ فقط واللہ اعلم

الجواب صحیح                                                                                                                                                                                                                                                                                                                                                کتبہ

محمد عبدالسلام عفااللہ عنہ                                                                                                                                       ابوبکر سعید الرحمان‘‘

۳۔’’ تو نے اتنا بھر دیا ہے  کشکول بھرتے بھرتے ‘‘ اس جملہ میں کہنے والے کی مراد  کیا ہے ؟ اگر مراد یہ ہے کہ  آپ ﷺ  کی برکت اور طفیل سے اللہ پاک نے مجھے انعامات سے نوازا ہے، تویہ صحیح ہے اس میں شرک نہیں ہے۔  (مستفاد: فتاوی رشیدیہ ص184 ط:عالمی مجلس تحفظ ِ اسلام)

فقط واللہ اعلم