سوال

١) مشت زنی سے اجتناب کا راستہ بتاںٔیں ۔ ٢) مجھے کبھی کبھار شہوت ابھر آتی ہے اور زنا کرنے کا یا مشت زنی کا شوق ابھرتا ہے اور میری عمر شادی کرنے کی ابھی نہیں ہوئی ہے تو کوئی ایسا حلال راستہ بتائیں کہ جس سے شہوت قابو میں  ہو اور گناہ بھی نہ ہو ۔ 

جواب

صورت مسئولہ میں مشت زنی کے گناہ سے بچنے اور اس کی عادت سے چھٹکارہ حاصل کرنے  کے لیے  نیک ماحول اور اچھے لوگوں کی  صحبت اختیار کریں،  اگران گناہوں سے بچنا مشکل ہورہاہو تو  یہ سوچیں  کہ اگر اس گناہ کے کرتے وقت مجھے میرے والدین (یا کوئی بھی ایسے رشتہ و تعلق والا شخص جس سے انسان اپنا گناہ چھپانا چاہے مثلاً اساتذہ وغیرہ) دیکھ لیں  یا انہیں علم ہوجائے تو کیا میں ان کے سامنے یہ گناہ کرسکوں گا؟ یا شرمندہ ہوں گا؟ پھر یہ سوچیں کہ جب میں والدین کے سامنے گناہ سے شرماتا ہوں تو اللہ تعالیٰ جو ہر وقت  مجھے دیکھ رہے ہیں، جو میرے خالق اور  حقیقی محسن ہیں اور حساب و کتاب پر مکمل قادر ہیں، ان کے سامنے میں کس منہ سے حاضر ہوں گا، نیز یہ سوچیں کہ قیامت کے دن اگر والدین، بہن بھائیوں، اساتذہ، دوستوں  اور تمام مخلوق کے سامنے بتادیا گیا کہ فلاں بن فلاں نے فلاں دن فلاں وقت یہ گناہ کیا ہے، تو اس وقت آدمی شرم سے پانی پانی ہوجائے گا، قیامت کا وہ منظر سوچیں تو امید ہے کہ گناہوں کا ترک کرنا آسان ہوجائے گااور ان سب باتوں کی عادت پیدا کرنے کے لیے اللہ تعالیٰ کے نیک بندوں کی صحبت انتہائی ضروری ہے، اس کے ساتھ ساتھ فرض نمازوں کی پابندی کے علاوہ اللہ تعالی سے ان گناہوں سے بچنے کی خصوصی دعا کرتے رہیں، ہماری بھی دعا ہے کہ اللہ تبارک و تعالیٰ آپ کو  اس گناہ  سمیت تمام گناہوں سے سچی توبہ کی توفیق  عطا فرمائے، اور شریعت کے احکام پر چلنا آسان فرمائے۔

نیز اس کے ساتھ مندرجہ ذیل چند اعمال کا اہتمام بھی کریں :

۱۔جتنا جلدی ممکن ہو شادی کرلیں، اور شادی کے سلسلے میں معاشرے میں رائج اخراجات اگر نہیں برداشت کرسکتے تو سادگی کے ساتھ کسی متوسط یا غریب گھرانے میں شادی کرلیں، حدیثِ مبارک میں ہے کہ اس نکاح میں سب سے زیادہ برکت ہوتی ہے جس میں کم خرچ اور بوجھ ہو۔ 

 ۲۔ورنہ کثرت سے روزے  رکھیں، روزے رکھنے کی طاقت نہیں ہے تو جتنے روزے رکھنے سے شہوت اور قوت ٹوٹنے لگے اتنے روزے رکھیں۔

۳۔ہمیشہ باوضو رہنے کی عادت  بنائیں۔

 ۴۔ہر وقت ذکر کا اہتمام کریں، سوائے بیت الخلا، غسل خانے اور ایسی جگہ کے جہاں ذکر کرنا درست نہیں ہے۔

۵۔ تنہائی میں وقت نہ گزاریں۔

۶۔ جب تک یہ عادت نہ چھوٹے روزانہ دو  رکعت  نفل توبہ و حاجت کی نیت سے پڑھ کر اللہ سے اس  گناہ سے چھٹکارے کی دعا مانگیں۔

 ۷۔کثرت سے اس دعا  کا ورد کریں: "اَللّٰهُمَّ إِنِّيْ أَسْئَلُكَ الْهُدٰی وَالتُّقٰی وَالْعَفَافَ وَالْغِنٰی"۔

۸۔کثرت  کے ساتھ   سید الاستغفار پڑھنے کا اہتمام کریں ، ان شاء اللہ یہ عادت جلد ہی چھوٹ جائے گی۔    سید الاستغفار یہ ہے: 

"اللَّهُمَّ أَنْتَ رَبِّي لاَ إِلَهَ إِلَّا أَنْتَ، خَلَقْتَنِي وَأَنَا عَبْدُكَ، وَأَنَا عَلَى عَهْدِكَ وَوَعْدِكَ مَا اسْتَطَعْتُ، أَعُوذُ بِكَ مِنْ شَرِّ مَا صَنَعْتُ، أَبُوءُ لَكَ بِنِعْمَتِكَ عَلَيَّ، وَأَبُوءُ لَكَ بِذَنْبِي فَاغْفِرْ لِي، فَإِنَّهُ لاَيَغْفِرُ الذُّنُوبَ إِلَّا أَنْتَ". (صحیح بخاري)

فقط و اللہ اعلم