سوال

اگر کسی شخص کو دھات کی بیماری ہو،  تو اس حالت میں نماز کا کیا حکم ہیں؟   مسلسل دھات چلتی رہتی ہے!

جواب

بصورتِ مسئولہ دھات  (یعنی بغیر شہوت کے  بیماری)  کی  وجہ سے منی نکلنے  سے صرف وضو  ٹوٹتا ہے، البتہ  اگر بیماری کی وجہ سے مسلسل منی نکلتی ہے اور  اس کو  کسی نماز کے پورے وقت میں اتنا وقت نہیں مل پاتا کہ وہ وضو کرکے فرض نماز اس عذر  ( منی کے نکلنے) کے بغیر پڑھ سکے ،  تو  شرعاً ایسا شخص معذور ہے،  پھر جب تک کسی نماز کا پورا وقت اس عذر  کے بغیر نہ گزر جائے وہ شرعی معذور رہے گا،  نیز شرعی معذور کا حکم یہ ہے کہ وہ ہر نماز کے وقت ایک بار وضو کرلیا کرے، جب تک وہ وقت باقی ہے اس عذر کی وجہ سے اس کا وضو ساقط نہیں ہوگا، وقتی فرض، قضا نماز اور نوافل و تلاوت جو چاہے عبادت کرتی رہے، جب نماز کا وقت نکل جائے گا تو وضو ختم ہوجائے گا، اگلی نماز کے لیے دوسری مرتبہ وضو کرلے۔ اسی طرح اگر اس عذر کے علاوہ، وضو توڑنے والا کوئی سبب پایا جائے تو بھی وضو ٹوٹ جائے گا۔

اگر کسی نماز کا پورا وقت اس طرح گزر گیا کہ اس کو  یہ عذر پیش نہیں آیا، تو مذکورہ شخص معذور نہیں رہے گا،نیز اگر کسی بھی نماز کا وقت اس طرح نہ گزرے کہ  طہارت کے ساتھ وقتی فرض نماز ادا نہ کرسکے، یعنی ہر نماز کے وقت میں اتنا وقت مل جائے کہ طہارت کے ساتھ وقتی فرض نماز ادا کرسکے  تو  مذکورہ شخص شرعاً معذور نہیں  ہوگا، بلکہ ہرنماز کے لیے وضو کرکے نماز پڑھنا ضروری ہوگا۔

فتاوی شامی میں ہے:

"(وصاحب عذر من به سلس) بول لايمكنه إمساكه (أو استطلاق بطن أو انفلات ريح أو استحاضة) أو بعينه رمد أو عمش أو غرب، وكذا كل ما يخرج بوجع ولو من أذن وثدي وسرة (إن استوعب عذره تمام وقت صلاة مفروضة) بأن لايجد في جميع وقتها زمنًا يتوضأ ويصلي فيه خاليًا عن الحدث (ولو حكمًا) لأن الانقطاع اليسير ملحق بالعدم (وهذا شرط) العذر (في حق الابتداء، وفي) حق (البقاء كفى وجوده في جزء من الوقت) ولو مرة (وفي) حق الزوال يشترط (استيعاب الانقطاع) تمام الوقت (حقيقة) لأنه الانقطاع الكامل. (وحكمه الوضوءلكل فرض) اللام للوقت."

(أحكام المعذور، ج:1، ص:305، ط:ايج ايم سعيد)

فقط والله اعلم