سوال

 اگر کوئی شخص ایسی  جگہ کام کر رہا ہو،  جس کی مسافت سفر  کی مسافت کے برابر ہو تو وہ قصر کی نمازپڑھے  گا یا نہیں ؟

جواب

بصورتِ مسئولہ اگر کسی شخص  کے  علاقے (شہر/ قصبے) اور  منزلِ مقصود کے درمیان شرعی  مسافت (سوا ستتّر کلومیٹر)   پوری  ہے یا اس سے زیادہ مسافت ہے، اور منزلِ مقصود میں اگر پندرہ دن سے کم اقامت کا ارادہ ہے تو  وہاں قصر کی نماز پڑھےگا، بشرطیکہ جہاں وہ جانا چاہ رہا ہے وہ اپنے شہر سے باہر ہو،  نیز قصر کی رخصت شہر کی آبادی سے باہر نکلنے کی صورت میں حاصل ہوگی۔ اور پندرہ دن قیام کا ارادہ ہے تو  پوری نماز پڑھےگا۔

فتاوی شامی میں ہے:

"(من خرج من عمارة موضع إقامته) من جانب خروجه (قاصدًا) و لو كافرًا، ومن طاف الدنيا بلا قصد لم يقصر (مسيرة ثلاثة أيام ولياليها) من أقصر أيام السنة و لا(صلى الفرض الرباعي ركعتين) وجوبا لقول ابن عباس: «إن الله فرض على لسان نبيكم صلاة المقيم أربعًا (حتى يدخل موضع مقامه)".

(کتاب الصلوۃ، باب صلوۃ المسافر، ج:2، ص:122/ 123، ط:ایج ایم سعید)

فقط واللہ اعلم