سوال

میں نے کل ایک دکان دار سے ایک کلو مرغی خریدی، جس کی قیمت 570روپے تھی۔ مرغی تولنے کے بعد دکان دار نے اس کی صفائی وغیرہ کی، اس کے بعد مجھے دے دی، تو مجھے یہ عجیب لگا کہ پہلے تولی، پھر صفائی کی، پھر جب وزن کیا تو جو رقم اس نے ایک کلو کی بتائی  تھی  570، اُس سے 100کم ہوگئے۔ مطلب یہ ہے کہ دکان دار نے 100روپے زیادہ لیے، کیا یہ جائز ہے؟

جواب

ہمارے ہاں مرغی کی خریداری کے دو طریقے رائج ہیں:

1. زندہ مرغی کی خرید و فروخت۔

2. مرغی کے گوشت کی خرید و فروخت ۔

ان دونوں طریقوں میں سے ہر ایک طریقے میں مرغی کی قیمت مختلف ہوتی ہے، پہلی صورت میں قیمت کچھ کم ہوتی ہے، جب کہ دوسری صورت میں قیمت کچھ زیادہ ہوتی ہے؛ اس لیے کہ  پہلی صورت میں گوشت کے علاوہ زائد اشیاء زیادہ مقدار میں نکلتی ہیں  اور دوسری صورت میں زائد اشیاء کی مقدار کم ہوتی ہے۔

بہرحال! دونوں ہی صورتوں میں گاہک کے گوشت وصول کرنے سے پہلے زائد اشیاء نکالی جاتی ہیں، جس کے بعد گوشت کی مقدار کم ہوتی ہے، لیکن ایسی خرید و فروخت کا چوں کہ رواج ہو گیا ہے اور اس پر کوئی شخص اعتراض بھی نہیں کرتا؛ اس لیے یہ معاملہ شرعاً درست ہوتا ہے اور مرغی فروش کی کمائی حلال ہوتی ہے۔