سوال

کیا بچہ کا نام ملاحم رکھا جا سکتا ہے۔جیسے رسول الملاحم یا محمد ملاحم احمد؟

جواب

"مُلَاحَم"  میم کے پیش اور حاء کے زبر  کے ساتھ اس کا معنی ہے:مضبوط بٹی ہوئی رسی۔

"مَلَاحِم"  میم کے زبر اور حاء کے زیر کے ساتھ اس کا معنی ہے: جنگیں، خون ریزیاں، میدانِ جنگ۔ (القاموس الوحید، ص:1461، ط:ادارۃ الاسلامیات)

بصورت مسئولہ پہلے تلفظ اور معنی کے اعتبار سے   "ملاحم"  (مُلَاحَم) نام رکھنے کی گنجائش ہے اور دوسرے تلفظ (مَلَاحِم)اور معنی کے اعتبار سے مذکورہ نام نامناسب معنی کی وجہ سےرکھنا درست نہیں ہے،اسی طرح رسول الملاحم نام رکھنا بھی درست نہیں ؛کیونکہ اس کا معنی ہے جنگوں والے رسول اور یہ حضور صلی اللہ علیہ وسلم کی خصوصیت ہے ، تاہم جدت کی طرف مائل ہوئے بغیر مذکورہ نام کے علاوہ کوئی مناسب معنی والا نام انبیا ء علیہم السلام اور صحابہ کرام رضی اللہ عنہم میں سے کسی کے نام پر نام رکھنا   بہتر اور باعثِ برکت ہوگا۔

فقط واللہ اعلم