سوال

 ایم ٹی ایف ای ایک آن لائن کمپنی کی  ایپ ہے، مذکورہ کمپنی (MTFE) کے بقول : ان پیسوں سے آپ اس اپلیکیشن پر مینول طریقہ سے بھی ٹریڈنگ کرسکتے  ہیں،اور دوسرا آپشن اس میں آرٹیفیشل انٹیلیجنس یعنی (Ai) کا ہے، تو جب آپ Ai کو اس اپلیکیشن میں آن کرتے ہے، تو پھر Ai ہی آپ  کے لیے ٹریڈنگ کررہا ہوتا ہے، اور آپ کے انویسمنٹ کیٹیگری کے حساب سے روزانہ منافع دیتا ہے۔

مثال کے طور پر اگر آپ کے MTFE میں 201 ڈالر پڑے ہیں، تو وہ روزانہ 5 سے لے کر 12 ڈالر تک کا منافع دیتا ہے، نیز ہفتے اور اتوار کے دن چھٹی ہوتی ہے ، ہفتے میں ایک آدھ بار اتنا ہی خسارہ بھی ہوتا ہے، کمپنی کرپٹو میں بھی ٹریڈ کرتی ہے اور مشہور کمپنیاں جیسے ٹیسلا، یو ایس آئیل، وغیرہ میں بھی ٹریڈ کرتی ہے، جس کا اپلیکیشن میں گراف ہوتا ہے اونچ نیچ کا۔ برائے مہربانی رہنمائی فرمائیں کہ یہ حلال ہے یا حرام؟

جواب

واضح رہےکہ  شرعاً   شرکت اور مضاربت  میں  نفع کی مقدار نفع کی فیصدی اعتبار سے طے کرنا لازمی ہے،یعنی انوسٹر جب کسی فرد یا کسی کمپنی میں اپنی رقم انوسٹ کرے، تو کمپنی کو جو منافع ہو اس میں  سے طے شدہ فیصد  انوسٹر کو بطور منافع  ادا کرے تو  یہ شرعاً جائز ہے، اس کے برخلاف  انوسٹر کے لیے  بطور منافع  مخصوص رقم متعین کرنا،  یا اصل سرمایہ کے تناسب سے رقم کا ملنا  شرعاً   ناجائز ہے۔

لہذا صورتِ مسئولہ میں سائل  کی بیان کردہ صورت کے مطابق اصل سرمایہ کے تناسب سے انوسٹر کو منافع ملتا ہے،  لہذا مذکورہ صورت میں MTFE کمپنی میں انوسٹمنٹ ناجائز ہے، اور اس کمپنی سے حاصل ہونے والی  آمدحرام اور سود   ہے، نیز  مذکورہ کمپنی اگر کرپٹو کرنسی میں ٹریڈ کرتی ہے تو اس بنیاد پر بھی اس کمپنی میں انویسٹمنٹ کرنا شرعًا جائز نہیں ہوگا، باقی یہ کمپنی آگے جن مقامات پر انوسٹمنٹ کرتی ہے اس کی شرائط  اور طریقہ کار اس سوال میں موجود نہیں ہے، لہذا طریقہ کار اور شرائط ذکر کی جاۓ تو مکمل تفصیلی جواب دیا جاۓ گا۔