سوال

کیا چلتے پھرتے مصحف یا موبائل سے قرآن پڑھ سکتے ہیں؟

جواب

واضح رہے کہ  موبائل میں  قرآن مجید بغیر وضوکے پڑھ سکتے ہیں، البتہ صفحات     پلٹنے وغیرہ کی غرض سےحروف قرآنیہ وغیرہ کو چھو نے کی ضرورت ہو تو با وضو ہو نا  ضروری ہے، بغیر وضو کے ہا تھ لگانا جا ئز نہیں ۔

صورتِ مسئولہ میں موبائل کی اسکرین حائلِ متصل ہے، لہٰذا اگر موبائل کی اسکرین پر قرآنِ کریم کھلا ہوا ہو تو بے وضو اسکرین کو چھونا جائز نہیں ہے، کیوں کہ جس وقت قرآنِ کریم اسکرین پر کھلا ہوا ہوتا  ہےتو  اس وقت اسکرین کو چھونا قرآن کو چھونے کے حکم میں ہوتا ہے، البتہ  عظمت  قرآن کریم کا تقاضا اور مناسب   یہی ہے کہ جب تلاوت کے  لیے موبائل پر قرآن کریم کھولاجائے تو باوضو ہو کر کھولاجائے  اور یہی احتیا ط کی بات ہے،اسی طرح چلتے پھرتے بھی قرآن پڑھنا جائز ہے ۔

فتاوی ہندیہ میں ہے :

"ولا بأس بالقراءة راكبا وماشيا إذا لم يكن ذلك الموضع معدا للنجاسة، فإن كان يكره، كذا في القنية".

(کتاب الکراھیۃ، 316/5،دار الفکر)

فتاوی ہندیہ میں ہے :

"مس المصحف لا يجوز لهما وللجنب والمحدث مس المصحف الا بغلاف متجاف عنه کالخريطة والجلد الغير المشرز لابما هو متصل به."

( کتاب الطھارۃ ،39/1،دار الفكر بيروت)

فقط واللہ اعلم