سوال

فضائل اعمال کتاب میں  ہے: منبہات ابن حجر میں ہے کہ علماء نے لکھا ہے ، مسواک کے اہتمام میں ستر فائدے ہیں،  جن میں سے ایک موت کے وقت کلمہ شہادت پڑھنا نصیب ہوتا ہے۔  (فضائل نماز ،  شیخ الحدیث مولانا محمد  زکریا رحمۃ اللہ علیہ، صفحہ نمبر 206 )

منبہات ابن حجر کو بھی دیکھ لیا جائے،  کیا یہ باتیں حدیث سے ثابت ہیں؟ 

جواب

یہ بات ’’منبہات‘‘ نامی کتاب جو حافظ ابن حجر رحمہ اللہ کی طرف منسوب ہے، اس میں اور ’’مرقاۃ المفاتیح شرح مشکاۃ المصابیح‘‘ میں موجود ہے، لیکن کسی حدیث کا حوالہ نہیں ہے، اور نہ کسی اور جگہ ہمیں یہ بات کسی حدیث میں ملی؛ اس لیے  اس کو حدیث کے طور پر بیان نہ کیا جائے۔ البتہ حدیث کی طرف نسبت کیے بغیر بیان کرنے میں حرج نہیں۔ مرقاۃ المفاتیح شرح مشکاۃ المصابیح میں ہے:

"فإنه قيل: فيه سبعون فائدة، أدناها أن يذكر الشهادة عند الموت، وفي الأفيون سبعون مضرة، أقلها نسيان الشهادة، نسأل الله العافية".

(مرقاة المفاتيح شرح مشكاة المفاتيح: باب السواك (1/ 395)، ط.  دار الفكر، بيروت ، الطبعة  الأولى: 1422هـ = 2002م)

فقط واللہ اعلم