سوال

ہم احناف مسلک کے قائل ہیں ، مسجد بھی دیوبند حنفی کی ہے۔  ہماری مسجد میں ایک شخص کبھی کبھار عصر کی اذان مثل ثانی کے داخل ہونے سے پہلے دیتاہے۔تو ایسی اذان کا کیا حکم ہے؟

جواب

واضح رہے کہ عصر کا ابتدائی وقت احناف کے  مفتیٰ بہ  قول  کے مطابق یہی ہے کہ   جب  ہر چیز کا سایہ ، اصلی سائے کے علاوہ  اس چیز کے دو مثل ہوجائے، تو عصر کاوقت داخل ہوتا ہے۔ نیز اگر اذان وقت کے داخل ہونے سے پہلے دے دی گئی تو اس کا اعتبارنہیں،ایسی صورت میں   نماز   کا وقت  داخل ہونے کے بعد دوبارہ اذان دی جائے تاکہ اذان کی سنت ادا ہوجائے۔

صورت مسئولہ میں  وقت داخل ہونے سے پہلے جو اذان دی گئی وہ معتبر نہیں، وقت داخل ہونے کے بعد دوبارہ اذان دی جائے۔

مبسوط سرخسی میں ہے:

"قال (وإن أذن ‌قبل ‌دخول الوقت لم يجزه ويعيده في الوقت) لأن المقصود من الأذان إعلام الناس بدخول الوقت فقبل الوقت يكون تجهيلا لا إعلاما"

(باب الاذان، اذان المراۃ، 1/ 134،  ط: دار المعرفة بيروت)

البحر الرائق میں ہے:

"(قوله: والعصر منه إلى الغروب) أي ‌وقت ‌العصر من بلوغ الظل مثليه سوى الفيء إلى غروب الشمس."

(وقت صلوۃ الظهر، 2/ 258، ط: دار الكتاب الإسلامي) 

فقط واللہ اعلم