سوال

مقتدی کی تکبیر تحریمہ کی "اللہ اکبر"  کی "اکبر"  امام سے پہلے ادا ہوگئی تو مقتدی کی نماز  نہیں ہوگی،  حوالہ درمختار کا دیا ہے۔ کیا یہ مسئلہ درست  ہے؟

جواب

جی ہاں!  جماعت سے  امام  کے   پیچھے نماز  پڑھنے  کی صورت  میں  مقتدی  پر  لازم  ہے  کہ  اس  کی  تکبیر  تحریمہ  امام  کی تکبیر تحریمہ  سے  مؤخر ہو یعنی اس کی تکبیر امام کی تکبیر کے بعد ختم ہو، اگر مقتدی نے اپنی تکبیر تحریمہ امام کی تکبیر تحریمہ سے پہلے ہی مکمل کرلی تو وہ مقتدی اس امام کی اقتدا میں اس جماعت میں شامل ہی نہیں ہوا، لہٰذا  ایسے شخص کو چاہیے کہ امام کے تکبیر تحریمہ مکمل کرنے کے بعد دوبارہ تکبیر تحریمہ کہے، اگر اس نے دوبارہ تکبیر تحریمہ نہیں لوٹائی اور ایسے ہی نماز پڑھ لی تو اس کی نماز اس امام کی اقتدا میں نہیں ہوئی ؛ اس لیے اس کو یہ نماز دوبارہ لوٹانی پڑے گی۔

الدر المختار وحاشية ابن عابدين (رد المحتار) (1/ 480):

"ولايصير شارعًا بالمبتدأ فقط ك (الله) ولا ب (أكبر) فقط هو المختار، فلو قال: "الله"  مع الإمام و "أكبر"  قبله، أو أدرك الإمام راكعًا فقال: "الله"  قائمًا و "أكبر"  راكعًا لم يصح في الأصح؛ كما لو فرغ من (الله) قبل الإمام."

تحته:

"(قوله:  ولايصير شارعًا بالمبتدأ)؛  لأن الشرط الإتيان بجملة تامة كما مر في النظم. ولا يخفى أن الإتيان بالواو أحسن من الفاء التفريعية لأن ما قبله بيان للواجب وهذا بيان للشرط فلا يصح التفريع، فافهم."

فقط واللہ اعلم