سوال

میری شادی کو 9 سال ہو چکے ہیں۔ میری شادی کے چار ماہ بعد میں نے اپنی بیوی کو دو طلاقیں دے دیں، اور پھر شرعی طریقے سے رجوع کر لیا۔

اب دو ماہ پہلے دوبارہ جھگڑا ہوا۔ میں نے اس سے کہا: "میرا اور تیرا کوئی رشتہ نہیں۔" لیکن میری علیحدگی کی کوئی نیت نہیں تھی۔ اس کے بعد وہ چلی گئی اور کہا کہ اگر آپ خود لینے آئیں گے، تو میں واپس آؤں گی۔اس کے جانے سے پہلے بھی میں نے کہا تھا کہ میرا طلاق دینے کا کوئی ارادہ نہیں۔ اللہ تعالیٰ میری نیت کو بہتر جانتا ہے۔ عید کے بعد میں اسے لینے جاؤں گا۔

اب میرے لیے شرعی حکم کیا ہے؟کیا تیسری طلاق واقع ہو گئی ہے؟

جواب

صورت مسئولہ میں اگر واقعۃً سائل کا اپنی بیوی کو یہ کہنا کہ "میرا اور تیرا کوئی رشتہ نہیں" ان الفاظ سے  سائل کی نیت  طلاق کی نہیں تھی، تو اس سے طلاق واقع نہیں ہوئی ، بلکہ نکاح بدستور برقرار ہے۔البتہ آئندہ اس طرح کے الفاظ کہنے سے بھی اجتناب کیا جائے ۔

فتاوی عالمگیریہ میں ہے:

"ولو قال لها لا نكاح بيني وبينك أو قال لم يبق بيني وبينك نكاح يقع الطلاق إذا نوى."

(كتاب الطلاق،الباب الثاني،الفصل الخامس في الكنايات في الطلاق،ج:1،ص:375،ط:المکتبة الحبيبية)

فقط واللہ اعلم