سوال

میں نے شدید غصے میں نیند سے اٹھ کر اپنی بیوی سے لڑائی کے دوران بلوچی میں یہ الفاظ کہے ہیں "من طلاق دیاں ، طلاق ، طلاق "،یعنی میں طلاق دیتا ہوں ، طلاق ،طلاق۔ تو کیا ان الفاظ سے طلاق واقع ہوگئی ہے یا نہیں ؟اور میں رجوع کرنا چاہتا ہوں یا رجوع کی گنجائش ہے یا نہیں ؟

جواب

صورتِ مسئولہ میں جب سائل نے اپنی بیوی کو بلوچی میں ان الفاظ سے طلاق دی ہے کہ :"من طلاق دیاں ، طلاق ، طلاق "،یعنی میں طلاق دیتا ہوں ، طلاق ،طلاق،تو  اس سے سائل کی بیوی پر تینوں طلاقیں واقع ہوچکی ہیں ، بیوی اپنے شوہر (سائل) پر حرمت مغلظہ کے ساتھ حرام ہوچکی ہے، اب  سائل کے لیے شرعاً رجوع یا تجدید نکاح کی گنجائش نہیں ہے ۔ مطلقہ اپنی عدت(حمل کی صورت میں بچے کی پیدائش ورنہ پوری تین ماہواریاں )گزارنے کے بعد دوسری جگہ نکاح کرسکتی ہے۔

 ارشادِ ربانی ہے:

"{فَإِنْ طَلَّقَهَا فَلَا تَحِلُّ لَهُ مِنْ بَعْدُ حَتَّى تَنْكِحَ زَوْجًا غَيْرَهُ}." (البقرة: 230)

ترجمہ:"اگر بیوی کو تیسری طلاق دے دی  تو جب وہ عورت دوسرے سے  نکاح  نہ کرلے اس وقت تک وہ پہلے خاوند کے لیے حلال نہ ہوگی۔ "(بیان القرآن)