سوال

اگر کوئی مرد اپنی بیوی کو مذاق میں کہے کہ تم بھی شادی کرو اور میں بھی شادی کرتا ہوں ، تم مجھے آزاد کرو اور میں بھی آپ کو آزاد کرتا ہوں اور میں آپ کے ساتھ نہیں رہنا چاہتا اوربیگم بھی کہتی ہے میں بھی آپ کے ساتھ نہیں رہنا چاہتی، میں کہتا ہوں  مجھے تیری ضرورت نہیں، وہ بھی کہتی ہے مجھےتیری ضرورت نہیں اورمیں آپ کےاوپرجوپابندیاں لگاتاہوں کہ شادی بیاہ پرنہیں جانا، پردہ کرنا ہے اور بلاضرورت گھرسے باہرنہیں نکلنا وغیر وغیرہ، ایسی پابندیوں سے آپ کی جان چھوٹ جاۓ گی۔

اس طرح کےالفاظ ہم کبھی مذاق کی حالت میں اورکبھی غصہ کی حالت میں کہ دیتے ہیں ، اس بارے میں شریعت کیا کہتی ہے؟

جواب

واضح رہے کہ  لفظِ "آزاد" اصل کےاعتبار سےتو کنایہ ہے، لیکن ہمارےعرف میں  طلاق کا صریح لفظ بن چکا ہے؛ لہذا عرفاً صریح ہونے کی وجہ سے طلاق کے واقع ہونےکےلئے نیت یا قرینہ کا محتاج نہیں ،باقی اس سے بائنہ ہونا الفاظ کا تقاضا ہے،اس لیے اس سےطلاق صریح بائن واقع ہو تی ہے۔

لہٰذا صورتِ مسئولہ میں جو میاں بیوی کے ایک مکالمہ کی صورت اور انداز کو پیش کیا گیا ہے اس میں خاوند نے جو کچھ بیوی کو کہا اس سے طلاق واقع نہیں ہوئی، البتہ  جب خاوند نے بیوی کو یہ کہا کہ میں تمہیں آزاد کرتا ہُوں، تو یہ جملہ کہنے کی وجہ سے بیوی پر ایک طلاقِ بائن واقع ہوگئی ہے،  اور نکاح ختم ہوگیاہے۔ مطلقہ اپنی  عدت(مکمل تین ماہ واریاں اگر حمل نہ ہو اور حمل کی صورت میں بچہ کی پیدائش تک) گزار کر دوسری جگہ نکاح کرنے میں آزاد ہو گی۔البتہ اگر دونوں(  میاں بیوی)   باہمی رضامندی سے ایک ساتھ رہنا چاہتے ہیں تو  دو گواہوں کی موجودگی میں نئے مہر کے ساتھ تجدید نکاح کرکے رہ سکتے ہیں، اور آئندہ کے لیے شوہر کو دو طلاق کا حق حاصل ہوگا۔

 نیز: بہر صورت میاں بیوی کواس طرح کے الفاظ کہنے سے گریز کرنا چاہیے، بلا نیت اور مذاق میں بھی ایسے الفاظ نہیں کہنے چاہیے۔ کیوں کہ حدیث شریف میں ہے کہ تین چیزیں/باتیں ایسی ہیں، جن میں مذاق بھی حقیقت ہوتا ہے۔

سننِ ابن ماجہ میں ہے:

"عن أبي هريرة، قال: قال رسول الله صلى الله عليه وسلم: " ‌ثلاث ‌جدهن جد، وهزلهن جد: النكاح، والطلاق، والرجعة ".

(کتاب الطلاق، باب من طلق أو نكح أو راجع لاعباً، ج:1، ص658، ط:دار إحياء الكتب العربية-بیروت)

فتاوی شامی میں ہے:

"فإن سرحتک کنایة لکنه في عرف الفرس غلب استعماله في الصریح، فإذا قال: رہا کردم، أي سرحتک یقع به الرجعی مع أن أصله کنایة أیضا".

(كتاب الطلاق، باب الكنايات، ج:3، ص:299، ط:سعيد)