سوال

مسجد کے باہر پانی کی مشین لگا سکتے  ہیں؛  تاکہ لوگ پانی پی سکیں؟

جواب

صورتِ  مسئولہ میں مسجد کے چندے سے مسجد کے باہر  عام لوگوں کے  لیے پانی  کی مشین نہیں لگا سکتے ، مسجد کی آمدنی کو مسجد کے مصالح میں خرچ کرنا ضروری ہے۔ ہاں  اگر مخیر حضرات اپنی ذاتی رقم سے پانی کی مشین  لگانا چاہیں اور  اس سے آمد و رفت میں کوئی پریشانی نہ ہو تو اس کی شرعًا اجازت ہوگی، البتہ جو بجلی مسجد کی استعمال ہوگی اس  کی مد میں رقم مسجد میں جمع کرادی جائے۔

فتاوی رحیمیہ میں  ہے:

"جو رقم مسجد کے نام سے آئی ہے ، اس رقم سے گاؤں میں پانی پہنچانے کے  لیے ٹنکی نہیں بنا سکتے ، خواہ وہ مسجد کی جگہ اور اس کے احاطہ میں بنائی جائے۔"

(فتاوی رحیمیہ، جلد 9/صفحہ 282)

فقط واللہ اعلم