سوال

زید کی دو بیویاں تھیں،  ایک بیوی کو زید نے اپنی زندگی ہی میں طلاق دے دی،  لیکن انڈیا کے قانون کے اعتبار سے طلاق واقع نہیں ہوئی،  شریعت کے اعتبار سے ہو گئی،  اس پر ایک عالم صاحب کا کہنا یہ  ہے کہ مرنے والے کی جو پنشن ہے اور دیگر فوائد جس کا شریعتِ اسلامیہ میں کوئی تصور نہیں،  اس میں وہ بیوی بھی شریک ہوگی جو شریعت کی نظر میں مطلقہ  ہے،  اس لیے کہ جوقانون یہ سہولیات فراہم کر رہا ہے وہ اسے مطلقہ نہیں مانتا،  لیکن جو شرعی میراث ہے  اس میں صرف وہی بیوی شریک ہوگی جو موت تک زید کے نکاح میں تھی اور مطلقہ بیوی شرعی حقوق سے محروم رہے گی، کیا یہ مسئلہ درست ہے؟

جواب

بصورتِ مسئولہ زید کے انتقال کے بعد ان کے ترکہ میں بطورِ میراث مطلقہ بیوی حق دار نہیں ہوگی، تاہم مرحوم کے انتقال کے بعد  اگر پنشن کی رقم مرحوم کی مطلقہ  بیوی کے نام سے آرہی ہے تو اس میں مطلقہ بیوی حق دار ہے؛ کیوں کہ پنشن  کی رقم کسی بھی حکومتی ادارے کی طرف سے نامزد کردہ شخص کے  لیے عطیہ ہوتی ہے، بطورِ میراث نہیں ہوتی۔

’’چوں کہ میراث مملوکہ اموال میں جاری ہوتی ہے اور یہ وظیفہ محض تبرع واحسانِ سرکار ہے، بدون قبضہ کے مملوک نہیں ہوتا، لہذا آئندہ جو وظیفہ ملے گا اس میں میراث جاری نہیں ہوگی، سرکار کو اختیار ہے جس طرح چاہیں تقسیم کردے۔‘‘

(4/343، کتاب الفرائض، عنوان: عدم جریان میراث در وظیفہ سرکاری تنخواہ، ط: دارالعلوم)

فقط واللہ اعلم