سوال

میں زید کا ایک لاکھ کی رقم کا مقروض ہوں،  میرے پاس قرض کی ادائیگی کی کوئی صورت نہیں، کیا یہ جائز ہے کہ باہمی رضامندی سے ماہانہ تنخواہ طے ہوجائے اور اسی حساب سے قرض کی رقم پوری ہونے تک میں اس کی ملازمت کروں؟ یعنی قرض کی ادائیگی سروس کی صورت میں جائز ہے؟

جواب

اگر  سائل اور قرض خواہ  باہمی رضامندی سے مذکورہ طریقے پر قرض کی ادائیگی  کرنے پر راضی ہیں تو یہ درست ہے، بشرطیکہ سائل کی ملازمت کی  تنخواہ اتنی مقرر کی جائے جو  عام طور پر اس طرح کی ملازمت کی دی جاتی ہو، اس سے کم مقرر نہ ہو، اگر سائل کی    تنخواہ عام تنخواہ سے کم ہوئی تو یہ صورت جائز نہیں ہوگی اور یہ سروس (خدمت ) کے ذریعہ قرض کی ادائیگی نہیں ہے، بلکہ ہر ماہ سائل کی تنخواہ کی رقم سے قرض کی ادائیگی ہوگی۔

وفي حاشية ابن عابدين:

"وفي الأشباه: كل قرض جر نفعاًحرام".

  (5/166، مطلب كل قرض جرّ نفعًا، ط: سعید)

وفي درر الحكام في شرح مجلة الأحكام :

إذا استأجر الدائن من المدين مالا مقابل الدين الذي في ذمة المدين أو استأجر واستخدم نفس المدين جاز ويكون قد أدى الدين. (3/ 87ط:دار الجيل)

فقط و الله أعلم