سوال

اگر کسی شخص کے مالی حالات اچانک خراب ہو جائیں تو ایسی صورت میں اس شخص پر فطرہ واجب ہوگا ؟

جواب

جو مسلمان اتنا مال دار ہے کہ اس پر زکاۃ واجب ہے یا اس پر زکاۃ واجب نہیں، لیکن قرض اور ضروری اسباب اور استعمال کی اشیاء سے زائد اتنی قیمت کا مال یا اسباب اس کی ملکیت میں عید الفطر کی صبح صادق کے وقت موجود ہے جس کی مالیت ساڑھے باون تولے چاندی کی قیمت کے برابر یا اس سے زیادہ ہو تو اس پر عیدالفطر کے دن صدقہ فطر ادا کرنا  واجب ہے، چاہے وہ تجارت کا مال ہو یا تجارت کا مال نہ ہو، چاہے اس پر سال گزر چکا ہو یا نہ گزرا ہو۔

لہذا اگر کسی شخص کے حالات ایسے ہوں کہ اس کے پاس عید الفطر کے صبح صادق کے وقت ضرورت  و استعمال کے مال و سامان کے علاوہ ساڑھے باون تولہ چاندی کی قیمت کے بقدر مال اور سامان نہیں ہے تو اس پر صدقہ فطر ادا کرنا لازم نہیں ہے۔ فقط واللہ اعلم