سوال

گزارش یہ ہے کہ ایک موبائل ایپ جس نام NGR ENERGY ہے ،جس میں لوگ بڑی تعداد میں انویسمنٹ کررہے ہیں ،تحقیق کرنے کےبعد یہ بات سامنے آئی ہے کہ ان کی ظاہر کردہ چیزیں جعلی اور مشکوک ہیں ،جن کو آنے والے صفحہ پر ثبوت کے طور پر واضح کیا گیاہے۔

ظاہر ی حقیقت :

یہ موبائل ایپ ایک سولر کپنی کے طور پر اپنے آپ کو ظاہر کرتی ہے ،جس میں انہوں نے ایک جرمن کمپنی کے ساتھ معاہدہ کیا جس کے تحت یہ دنیا میں بجلی اور توانائی کی کمی پورا کرنےکےلیے سولر پینل یعنی شمسی پلانٹ فروخت کرتے ہیں جس کے تحت یہ کمپنی لوگوں سے کہتی ہے کہ آپ ہمارے سولر پروگرام میں انویسمنٹ کریں ،جس کے تحت 20000(بیس ہزار )کی رقم انویسٹ کرنے پر 3024(تین ہزار چوبیس )کاپروفٹ ملتاہے،اسی طرح 20000سے لےکر 500000کی مختلف انویسمنٹ پروگرام ہیں ،جس میں لوگ بڑی تعداد میں پیسہ لگارہے ہیں ،پروفٹ کی رقم جو مقرر کردہ ہوتی ہے ہفتہ وار وہ فکس نہیں آتی بلکہ 50 روپے کم 200 روپے زیادہ آتی ہے۔

جعلی معاملات:

1-جعلی چیز اس میں ایک تویہ ہےکہ ان کی ویب سائٹ پر تمام معاہدے کے سرٹیفیکٹ جعلی ہیں جوآگے صفحہ پر ثبوت کے طور پر رکھے گئے ہیں۔

2-اس کے علاوہ اگر یہ سولر پینل بیچتے ہیں توان کی کوئی تصویر یاویڈیو موجود ہونا چاہیئے جب کہ ان کی ایپ میں کچھ تصویر موجود ہیں جس میں ان کےورکرزکام کرتے دکھائی دے رہے ہیں جب تحقیق کی گئی تووہ تصویر بھی جعلی نکلیں ،یہ تصویر آگے صفحہ پرموجود ہیں جو کہ ایک اور واضح ثبوت ہے۔

3-ایک اور تشویش میں مبتلا کردینے والی چیز یہ ہےکہ جس ایپ میں لوگ انویسٹ کررہے ہیں اس میں کرپٹوکرنسی سے متعلق ویڈ یو موجود ہیں حالانکہ بجلی اور کرپٹوکرنسی کا آپس میں کوئی تعلق نہیں ،اس کا ثبوت بھی آگے صفحہ پر موجود ہے۔

4-ان کی ویب سائٹ www.ngr01.me پوری اس کی www.solarvoltaik.net اٹھائی گئی  کیوں کہ یہ بھی سولر ویب سائٹ ہے اسی لیے اس کاانتخاب کیاگیا۔

5-ایک اور اہم بات ان کا کوئی آفس یاایڈرس موجود نہیں ،فون نمبر موجود ہے پر اس پر بھی رابطہ ممکن نہیں ۔دونوں کمپنیوں GOLDEN SOLAR اور NGR کی ویب سائٹ اور سرٹیفیکٹ بھی ایک جیسے ہیں ۔

ان تمام چیزوں کو دیکھ کر ایک عدم اعتماد کی صورتحال پیداہوگئی ہے کہ اس سے مزید پیساکمایاجائے یانہیں ،یہ حلال ہے یہ حرام،اگر یہ حقیقت میں سولر بجلی پینل کاکام نہیں کرتی توگوں کاپیسہ کہاں لگ رہاہے ،کسی دہشتگرد ی یاکسی سودی کاروبار میں تونہیں ۔

لہٰذا آپ سے درخواست ہے کہ رہنمائی فرمایں کہ لوگ اس ایپ پر انویسمنٹ روک دیں یاپیسہ کماناجاری رکھیں ؟عوام کی بڑ ی تعداد روزانہ اس پر پیسہ لگارہی ہے اس پر قرآن وسنت کی روشنی میں رہنمائی فرمائیں ۔

جواب

واضح رہےکہ آن لائن کاروبار میں اگر "مبیع" (جوچیزفروخت کی جارہی ہو)بیچنے والے کی ملکیت میں نہیں ہے اور وہ محض اشتہار ،تصویردکھلاکر کسی کو وہ سامان فروخت کرتا ہو تو یہ صورت بائع کی ملکیت میں "مبیع" موجود نہ ہونے کی وجہ سے جائز نہیں ہے؛ اس لیے کہ جو چیز فروخت کرنا مقصود ہو وہ بائع کی ملکیت میں ہونا شرعاً ضروری ہوتا ہے،لہٰذا صورت مسئولہ میں مذکورہ ایپ میں پیسے لگانا اور کاروبار کرناجائز نہیں ہے۔

مجمع الزوائد میں ہے:

"وعن عبد اللہ بن مسعود قال: قال رسول اللہ صلی اللہ علیہ وسلم: من غشنا فلیس منا والمکر والخداع في النّار."

(کتاب البیوع، باب الغش: 4/ 139، ط: دار الفکر، بیروت)

الدرالمختار مع الرد المحتار میں ہے:

"(وما لا تصح) إضافته (إلى المستقبل) عشرة (البيع، وإجازته، وفسخه، والقسمة والشركة والهبة والنكاح والرجعة والصلح عن مال والإبراء عن الدين) لأنها تمليكات للحال فلا تضاف للاستقبال كما لا تعلق بالشرط لما فيه من القمار، وبقي الوكالة على قول الثاني المفتى به."

(باب السلم ،مطلب ما يصح إضافته وما لا تصح،ج:5،ص:256،ط:سعید)

فقط واللہ اعلم