سوال

میں اپنے بھائی کا نومولود بیٹا گود لینا چاہتا ہوں۔ جب کہ میری اپنی تین بیٹیاں ہیں۔ میرا سوال یہ ہے کہ اس لے پالک کا میری بچیوں سے رشتہ محرم کا ہو گا یا غیر محرم کا؟ اگر میری بیوی اس بچے کو اپنا شیر(دودھ) پلائے تو پھر اس کا میری بچیوں سے کیا رشتہ ہو گا؟

جواب

بصورتِ مسئولہ گود لیا ہوا بچہ  محض گود لینے سے  اپنی چچی (سائل کی اہلیہ) اور چچا  (سائل)  کی بیٹیوں  کے لیے محرم نہیں بنے گا، بلکہ غیر محرم ہی رہے گا اور اس سے پردہ واجب ہوگا، البتہ  اگرگود لینے والی عورت (چچی) نے اس بچے کو اپنا  دودھ پلادیا  تو وہ اس کی رضاعی ماں  اور اس  چچا (سائل) کی بیٹیاں اس بچے  کی رضاعی بہنیں بن جائیں گی، وہ بچہ بھی ان  کا محرم بن جائے گا۔

قال تعالی: {وما جعل أدعياءكم أبناءكم ذلكم قولكم بأفواهكم والله يقول الحق وهو يهدي السبيل} [الاحزاب:4]

التفسير المظهري (7 / 284):

"فلايثبت بالتبني شىء من أحكام البنوة من الإرث وحرمة النكاح وغير ذلك".

الدر المختار وحاشية ابن عابدين (رد المحتار) (3 / 31):

"يحرم من الرضاع أصوله وفروعه وفروع أبويه". فقط و الله أعلم