سوال

لڑکی  نے  لڑکے کو  وکیل بنایا اور لڑکے نے اپنا نکاح خود پڑھایا اور لڑکے نے  دو شرعی گواہوں کی موجودگی میں یہ کہا کہ  میں فلاں کو اتنے  مہر میں اپنے نکاح میں قبول کرتا ہوں، کیا یہ نکاح ہو گیا؟

جواب

اگر عاقلہ بالغہ لڑکی اپنے نکاح کا وکیل لڑکے  کو بنائے اور لڑکا دو مسلمان مرد گواہوں کی موجودگی میں اس لڑکی سے اپنا نکاح خود پڑھالے تو یہ نکاح شرعًا منعقد ہوجائے گا ۔البتہ اگر لڑکی اپنے  والدین کی اجازت کے بغیر اس طرح نکاح کرتی ہے تو یہ   شرعاً و اخلاقاً پسندیدہ نہیں ہے،  اگر لڑکی نے  ولی کی اجازت کے بغیر    غیر کفو  میں نکاح کیا   تو   اولاد ہونے سے پہلے پہلے لڑکی کے اولیاء کو  عدالت سے  رجوع کرکے اس نکاح کو فسخ کرنے کا اختیار ہوتا ہے، اور اگر کفو میں نکاح کیا ہے توپھر لڑکی کے اولیاء   کو  نکاح  فسخ کرنے کا اختیار نہیں ہوتا ،  اور کفو کا مطلب یہ ہے کہ  لڑکا دین،دیانت، مال ونسب، پیشہ اور تعلیم میں لڑ کی کے ہم پلہ ہو ، اس سے کم نہ ہو، نیز کفاءت میں مرد کی جانب کا اعتبار ہے یعنی لڑکے کا لڑکی کے ہم پلہ اور برابر ہونا ضروری ہے، لڑکی کا لڑکے کے برابر ہونا ضروری نہیں ہے۔

فتاوی شامی میں ہے :

"(كما للوكيل) الذي وكلته أن يزوجها على نفسه فإن له (ذلك) فيكون أصيلًا من جانب وكيلًا من آخر."

(رد المحتار3/ 98ط:سعيد)

فتاوی شامی میں ہے:

"(فنفذ نكاح حرة مكلفة  بلا) رضا (ولي) والأصل أن كل من تصرف في ماله تصرف في نفسه وما لا فلا".

 (3/ 55، کتاب النکاح ، باب الولی، ط: سعید)

بدائع الصنائع  میں ہے:

"الحرة البالغة العاقلة إذا زوجت نفسها من رجل أو وكلت رجلاً بالتزويج فتزوجها أو زوجها فضولي فأجازت جاز في قول أبي حنيفة وزفر وأبي يوسف الأول سواء زوجت نفسها من كفء أو غير كفء بمهر وافر أو قاصر غير أنها إذا زوجت نفسها من غير كفء فللأولياء حق الاعتراض".

 (2/ 247،کتاب النکاح، فصل ولایۃ الندب والاستحباب فی النکاح، ط: سعید )

فقط واللہ اعلم