سوال

میں لاعلمی کی وجہ سے باجماعت نماز میں لفظ "سلام" کے ساتھ سلام نہیں پھیرتا  تھا اور صرف امام صاحب کے سلام کہنے پر ہی اکتفا کرتا تھا، اب مجھے معلوم ہوا ہے کہ "سلام" کہنا واجب ہے۔ برائے مہربانی اپنی گزشتہ نمازوں کو درست کرنے کا طریقہ بتا دیجیے۔ کیا اس کے لیے صرف توبہ کافی ہوگی، کہ آئندہ نماز کو پورے واجبات کے ساتھ ادا کیا جائے؟

جواب

نماز  سے لفظِ " سلام " کے ساتھ نکلنا نماز کے واجبات میں سے ہے جس کے چھوٹ جانے سے نماز اپنے وقت کے اندر واجب الاعادہ  ہے۔  اگر وقت کے اندر اندر نماز نہیں لوٹائی گئی تو اس کے بعد اُسی  نماز کو دوبارہ لوٹانا ضروری نہیں ہے؛ لہٰذا آئندہ "السلام علیکم ورحمۃ اللہ" کے الفاظ سے نماز مکمل کرنے کا اہتمام کیجیے، اور سابقہ کوتاہی پر استغفار و توبہ کافی ہے، نمازوں کو دہرانا ضروری نہیں ہے۔

"قيد في البحر في باب قضاء الفوائت وجوب الإعادة في أداء الصلاة مع كراهة التحريم قبل خروج الوقت، أما بعده فتستحب."

(رد المحتار مع الدر المختار: كتاب الصلاة، باب صفة الصلاة، مطلب كل صلاة أديت مع كراهة التحريم تجب إعادتها، (١ / ٤٥٧) ط: سعيد )

فقط واللہ اعلم