سوال

تروایح میں امام صاحب کی غلطی آجائے، اور سامع نہ بتائے، تو کیا میں غلطی بتا سکتا ہوں جب کہ مجھے پورا یقین ہو کہ صحیح بتاؤں گا؟

جواب

صورتِ مسئولہ میں اگر سامع غلطی نہیں بتاتا تو سائل اگر حافظ ہے تو لقمہ دے سکتا ہے، تاہم لقمہ دینے میں جلدی نہ کی جائے، بلکہ سامع کے لقمہ دینے کا انتظار کیا جائے، اس کے نہ دینے پر لقمہ دے دیا جائے، اور محض اپنے شک کی وجہ سے امام کو نہ ٹوکا جائے، تاکہ امام کے لیے آپ کا لقمہ دینا تشویش کا باعث نہ ہو، نیز لقمہ اس انداز سے دیا جائے کہ امام لے بھی سکے، ایسے نہ دیا جائے کہ جس کی وجہ سے امام مزید تشویش کا شکار ہوجائے۔

چوں کہ مذکورہ مسئلہ ایک گونہ انتظامی نوعیت کا بھی ہے، اس لیے زیادہ بہتر یہ ہے کہ جب تک امام سے ایسی غلطی نہ ہو جس سے معنیٰ فاسد ہوجاتا ہو  غیر سامع لقمہ نہ دے، امام صاحب یا سامع کو بعد میں بتاکر تصحیح کروادے یا امام صاحب سے اجازت لے لے کہ اگر سامع نے لقمہ نہ دیا تو مجھے لقمہ دینے کی اجازت دے دیجیے۔ فقط واللہ اعلم