سوال

مجھے یہ پوچھنا تھا کے مجھے بار بار کفریہ الفاظ کا وہم ہوتا ہے، مطلب میں کچھ بھی بولوں تو اس میں یہ لگتا ہے کہ نعوذ باللہ کچھ غلط کہہ دیا۔ نیز یہ بھی پوچھنا تھا کہ کفریہ الفاظ کی وجہ سے تجدید نکاح کرنا ہوتو کیا عورت خود دو شرعی گواہوں کے سامنے شوہر کی غیرموجودگی میں ایجاب و قبول کر سکتی ہے ؟آپ میرے سوال کا جواب جلدی  دیجئے گا کہ کسی بات کا دل میں شک ہو تو کیا اس سے بھی کفر لازم آتا ہے ؟ يا زبان سے کہے تب ہوتا ہے؟

جواب

واضح رہے کہ جب تک کوئی شخص اپنے ارادے/ اختیار سے زبان سے کلماتِ  کفریہ  ادانہ کرےوہ دائرۂ  اسلام سے خارج نہیں ہوتا، لہذا بصورتِ مسئولہ  آپ  کو صرف کفریہ کلمات  کا جو وہم یا شک ہورہاہے، اُس  کی وجہ سے کفرلازم  نہیں آئے گا اور نہ ہی آپ کو ایمان اور نکاح کی تجدید کی ضرورت  ہے،آپ کو چاہیےکہ اِن  وسوسوں اور شکوک و شبہات کی طرف توجہ نہ دیں بلکہ نماز اور ذکر و اذکار کا اہتمام کریں ، گناہوں سے اجتناب کریں اور” رَّبِّ أَعُوْذُبِكَ مِنْ هَمَزٰتِ الشَّیٰطِیْنِ وَأَعُوْذُ بِكَ رَبِّ أَنْ یَّحْضُرُوْنِ“  کا ورد کیا کریں۔مزید تفصیل کے لیے ملاحظہ ہو:

کفریہ اور گستاخانہ خیالات اور وساوس کا آنا اور اس کا علاج

باقی  اگر کوئی شخص حتمی و یقینی طور پر کفر کا ارتکاب کرے تو تجدیدِا یمان و تجدیدِ نکاح ضروری ہے، تجدیدِ نکاح میں ضروری یہ ہے کہ نئے مہر مقرر کر کے دو شرعی گواہان کی موجودگی میں مرد و عورت ایجاب و قبول کرلیں اور اگر مرد و عورت میں سے کوئی بذات خود موجود نہ ہو تو اُس  غیرموجود کی اجازت سے کوئی تیسرا شخص (جو گواہان کے علاوہ ہو) بطورِ وکیل  ایجاب و قبول کرے،لہذا تجدیدِ نکاح میں مرد کی غیرموجود گی اگر اُس کی طرف سے کوئی وکیل ایجاب و قبول نہ کرے تو فقط عورت کا ایجاب و قبول شرعاً غیرمعتبر ہے۔