سوال

 عشر کل گندم کا نکالا جائے یا اس کی مزدوری نکال کر باقی  گندم کا عشر نکالا جائے؟ میری گندم ہوئی ہے  61 من،  مزدوری 15 من ہے؟

جواب

واضح رہے کہ کھیتی کی تیاری میں جو اخراجات ہوتے ہیں، مثلاً: آب رسانی، مزدوری، کھاد وغیرہ انہیں آمدنی سے منہا کرکے عشر ادا نہیں کیا جائے گا، بلکہ مجموعی پیداوار میں سے عشر نکالنا ضروری ہو گا۔

اگر وہ زمین سال کے اکثر حصے میں قدرتی آبی وسائل (بارش، ندی، چشمہ وغیرہ) سے سیراب کی جائے تو اس میں عشر یعنی کل پیداوار کا دسواں حصہ (دس فیصد) واجب ہو گا، اور اگر وہ زمین مصنوعی آب رسانی کے آلات و وسائل مثلاً: ٹیوب ویل یا خریدے ہوئے پانی سے سیراب کی جائے تو اس میں نصف عشر یعنی کل پیداوار کا بیسواں حصہ (پانچ فیصد) واجب ہو گا۔

 لہذا صورتِ مسئولہ میں چوں کہ آپ کی پیداوار  61 من ہوئی ہوئی ہے، اس لیے عشر بھی 61 من کا ہی نکالا جائے گا۔

الدر المختار وحاشية ابن عابدين (رد المحتار) (2/ 326):
"(و) تجب في (مسقي سماء) أي مطر (وسيح) كنهر (بلا شرط نصاب) ......  (بلا رفع مؤن) أي كلف (الزرع) وبلا إخراج البذر". فقط و الله أعلم