سوال

ہمارے گھر  میں  بہت زیادہ مسئلے ہوگئے ، اکثر جھگڑے ہوا کرتے تھے ، اتوار والے دن کچھ ایسا ہو ا  کہ ہم ناشتہ کر رہے تھے ،ناشتہ کرکے  ہٹے تو ہم کسی ایک بات پر لڑنے لگے اور پھر میرے شوہر نے غصے میں کہا کہ تو چاہتی کیا ہے ؟ اور ایک ہی سانس میں  تین  طلاق دے دی ،تین بار  : "طلاق، طلاق ،طلاق " کہا ، اس کمرے میں ہم دونوں کے سوا کوئی نہیں تھا ،اوپر سے  بھابھی دیکھ رہی تھی اور اس کو بولا کہ میں نےطلاق دے دی ہیں ،اوپر اس کی بہن بھی تھی، یہی کہہ رہی تھی کہ میں نے سناہے ، اس وقت میر ے شوہر بہت غصے میں تھے ،طلاق دینے کے بعد وہ لمبا لیٹ گئے،اب  میرے شوہر مجھے دوبارہ اپنانا چاہتے ہیں ،بہت سے مولویوں سے پوچھا ہے ،کچھ کہہ رہے ہیں کہ ہوگئی ہےاور کچھ کہہ رہے ہیں  کہ نہیں ہوئی ، اب آپ  بتائیں کہ اس مسئلہ کا حل کیا ہے ؟اس بات کو ایک مہینہ ہوگیا ہے ،دوبارہ ملنا چاہتے  ہیں  ،حلالہ کے بغیر ہم دوبارہ نکاح کرسکتے ہیں ؟ہم بہت پریشان ہیں ،ہماری بیٹی بھی ہے ۔

جواب

صورتِ  مسئولہ میں اگرواقعۃً سائلہ کے شوہر نے  اسےیہ کہا کہ  ’’طلاق، طلاق، طلاق‘‘ تو اس سے    سائلہ   پر تین طلاقیں واقع ہوچکی ہیں، اور وہ   اپنے شوہر پر  حرمتِ مغلظہ کے ساتھ حرام ہوگئی ہے ، اب نہ رجوع ہو سکتا ہے، اور نہ ہی دوبارہ نکاح ہو سکتا ہے، اور مطلقہ اپنی عدت (پوری تین  ماہواریاں اگر حمل نہ ہو، اور اگر حمل ہو توبچہ کے پیدائش تک  ) گزارنے کے بعد کسی دوسری جگہ   نکاح   کر سکتی ہے، البتہ اگر مطلقہ عدت گزارنے کے بعد کسی  دوسری جگہ   نکاح کرے، اور اس دوسرے  شوہر کے ساتھ  صحبت (جسمانی تعلق)  بھی  قائم ہوجائے اس کے بعد وہ اس کو طلاق دے یا اس کا  انتقال ہو جائے، تو  اس کی عدت گزارنے کے بعد  سائلہ ک ااپنے سابقی شوہر کے ساتھ دوبارہ نکاح ہو سکتا ہے۔