صورتِ مسئولہ میں سائلہ نے  جس  حدیث کا مفہوم پیش کیا یہ حدیث  مسندِ احمد، المستدرک علی الصحیحین للحاکم  اور مجمع ا لوسائل فی شرح الشمائل  میں موجود ہے ،جو کہ حضرتِ ابو ہریرہ رضی اللہ تعالی عنہ سے مروی ہے ، جس میں  رسول اللہ صلی اللہ علیہ وسلم نے ارشاد فرمایا: "جمعہ کادن عید کادن ہے، پس تم  اپنی عید کے دن کو اپنے روزے کادن نہ بناؤ،البتہ اگر جمعہ کے دن سے پہلے ایک روزہ (ساتھ ملا کے رکھ لو)یا ایک روزہ جمعے  کے دن کے بعد (ملا کے رکھ لوتو درست ہے)۔

سائلہ کے فائدےکے لیےجمعہ کے دن روزہ رکھنے کا حکم بھی لکھ دیا جاتا ہے :

فائدہ (اول)

واضح رہے کہ حدیث شریف میں خاص جمعہ کے دن  روزے کا معمول بنا لینے سے منع فرمایاگیا ہے، نیز  جمعہ کے دن کو خاص کرکے موجبِ فضیلت سمجھ کر روزہ رکھنا یا اس کا التزام کرنا مکروہ ہے،البتہ  جمعہ کے ساتھ آگے پیچھے کوئی اور دن بھی ملا لیاجائے، تو درست ہے اور مکروہ نہیں ہے، اسی طرح اگر کبھی اتفاقًا رکھ لیا اور اسے خاص فضیلت کا سبب نہ جانا تو بھی اجازت ہوگی۔

فائدہ(دوم):

جمعہ کی دن روزہ رکھنے کی ممانعت کی وجوہات:

1۔جمعہ کے دن روزہ رکھنے کی ممانعت کی ایک وجہ تو یہی ہے ،جس کو حدیث میں بیان کیا گیا ہے،اور اس کی طرف علامہ ابن القیم نے زادالمعاد میں بھی اشارہ کیا ہے ۔

2۔دوسری وجہ  جمعہ کے دن روزہ  رکھنے کی ممانعت  کی  علامہ شامی نے تاتار خانیہ کے حوالے سے ذکر فرمائی، وہ یہ ہے کہ چوں کہ جمعہ کے دن اور بھی بہت سارے وظائف  واعمال (مثلاً جمعہ کی نماز کو جاناوغیرہ)ہیں ،کہیں ایسا نہ ہو کہ روزے کی وجہ سے ضعف پیدا ہو ،اور جمعہ کے مسنون و واجب اعمال میں کوتاہی کاسبب  بنے ۔

3۔ملاعلی قاری نے اپنی مایہ ناز تصنیف "مرقاۃ المفاتیح  شرح مشکاۃ المصابیح "میں جمعہ والے دن روزہ رکھنے کی ممانعت کی ایک وجہ یہ لکھی ہے کہ یہود ہفتہ کے روز کو  خاص کر کے اس کی تعظیم میں روزہ رکھنے کااہتمام کیا کرتے تھے ،اور عیسائی اتوار کے دن کی تعظیم کر کے خصوصیت سے اس میں روزہ رکھتے تھے ،اس  لیے حضور ﷺ نے منع فرمایا کہ یہود کی طرح کسی دن کی تخصیص کر کے ان کی مشابہت اختیار نہ کی جائے ،بلکہ یہ بات پسند فرمائی کہ ہمار(  شرعی)چال چلن ان سے مختلف ہو۔

4۔علامہ ابنِ قیم فرماتے ہیں کہ اس  ممانعت کی ایک بڑی وجہ یہ بھی ہے کہ کہیں ایسا نہ ہو کہ اہلِ کتاب کی طرح امتِ محمدیہ علی صاحبہا الصلوۃ والسلام بھی کسی دن کو دنیاوی اعمال سے فارغ کر کے عبادت کے ساتھ خاص کر لیں ،اور یہود ونصاریٰ کے ساتھ مشابہت اختیار کرلیں ،اور ایک ایسی چیز کا دین میں اضافہ کردیں ،جو دین میں (مذکورہ )طریقے پر ثابت نہیں ہے ۔

فائدہ (سوم)

جمعہ کو عید کہنے کی وجوہات:

1۔شرح الترغیب والترھیب میں لکھا ہے کہ جمعہ مبارک کو جو عید کہا گیا وہ اس وجہ سے کہا گیا کہ اللہ تعالی نے انسانوں پر پانچ وقت کی نماز کو فرض فرمایا اور دنیا  میں ہفتہ کے ایام بھی سات ہیں ،جب مسلمان بندہ اپنی ہفتہ بھر کی عبادات کو درجہ کمال تک پہنچادیتا ہے ،تو اس کو ایک عجیب قسم کی خوشی محسوس ہوتی ہے ،اس لیے اللہ تعالی نے جمعہ کے دن کو ہفتہ وار عید بنا دیا ،تا کہ بندے اس دن عید والے دن کی طرح عمدہ کپڑے پہن کر اورخوشبو وغیرہ لگا کر اللہ کے سامنے سربسجود ہوں ۔

2۔اس دن چوں کہ مسلمان جمع ہوتے ہیں ،اور عرفہ اورحج جیسامنظر نظر آنے لگتا ہے ،اس لیے اس دن کو عید ارشاد فرما دیا ۔

3۔حدیث میں آتا ہے کہ جو شخص جمعہ کی نماز پڑھتا ہے تو اس کے گزشتہ جمعہ سے اس جمعہ تک سارے گناہ معاف کردئیے جاتے ہیں ،اس لیے  بندے کو اس سے عجیب خوشی محسوس ہوتی ہے۔اس لیے اس دن کو عید فرمادیا ۔

4۔علامہ ابنِ تیمیہ فرماتے ہیں ،کہ جمعہ کو جو عید کہا گیا وہ اس  وجہ سے کہا گیا کہ یہ دن مسلمانوں پر بار بار لوٹتا ہے ،جس میں بندے اللہ کی عبادت کرتے ہیں ،یعنی لغوی اعتبار سے عید کہا گیا ،ورنہ اسلام میں عیدیں دو ہی ہیں ،جس پر تمام اہلِ اسلام کا تعامل وتوارث چلا آتا ہے ۔

و للہ الحمد علی ما أنعم اللہ علینا بالدین القویم المستقیم!

مسندِ احمد میں ہے :

"عن أبي هريرة، قال: سمعت رسول الله -صلي الله عليه وسلم - يقول: "إن يوم الجمعة يوم عيد، فلا تجعلوا يوم عيدكم يوم صيامكم، إلا أن تصوموا قبله أو بعده."

(‌‌ابتداء مسند أبي هريرة، رضي الله عنه،ج:8،ص:128 ،ط:دارالحديث)

"جمع الوسائل  في شرح الشمائل "میں ہے :

"عن أبي هريرة مرفوعا، يوم الجمعة ‌يوم ‌عيد، فلا تجعلوا يوم عيدكم يوم صومكم إلا أن تصوموا قبله أو بعده."

(‌‌باب ما جاء في صوم رسول الله - صلى الله عليه وسلم،ج:2،ص:100 ،ط:المطبعۃ الشرقیۃ)

المستدرک علی   الصحیحین "میں ہے :

"عن عامر بن لدين الأشعري، أنه سمع أبا هريرة، رضي الله عنه، يقول: سمعت رسول الله صلى الله عليه وسلم يقول: «يوم الجمعة عيد فلا تجعلوا يوم ‌عيدكم يوم صيامكم إلا أن تصوموا قبله أو بعده» هذا حديث صحيح الإسناد، ولم يخرجاه."

(کتاب الصوم ،‌‌وأما حديث شعبة،ج:1،ص:603،ط:دارالکتب العلمیۃ)

صحيح البخاری میں ہے:

"عن أبي هريرة رضي الله عنه، قال: سمعت النبي صلى الله عليه وسلم، يقول: «لا يصومن أحدكم يوم الجمعة، إلا يوما قبله أو بعده."

(كتاب الصوم،باب صوم يوم الجمعة،ج:2،ص700،ط:دار ابن كثير)

مرقاة المفاتيح میں ہے:

" نقول کره تعظيمنا يوم الجمعة باختصاصه بالصوم لأن اليهود يرون اختصاص السبت بالصوم تعظيما له والنصاري يرون اختصاص الأحد بالصوم تعظيما له ولما کان موقع الجمعة من هذه الأمة موقع اليومين من إحدي الطائفتين أحب أن يخالف هدينا هديهم فلم ير أن نخصه بالصوم."

 (کتاب لصوم ،479/4، ط: دار الکتب العلمیة)

فتاوی شامی میں ہے:

"وفي الخانية ولا بأس بصوم يوم الجمعة عند أبي حنيفة ومحمد لما روي عن ابن عباس أنه كان يصومه ولا يفطر. اهـ. وظاهر الاستشهاد بالأثر أن المراد بلا بأس الاستحباب وفي التجنيس قال أبو يوسف: جاء حديث في كراهته إلا أن ‌يصوم ‌قبله أو بعده فكان الاحتياط أن يضم إليه يوما آخر. اهـ. قال ط: قلت: ثبت بالسنة طلبه والنهي عنه والآخر منهما النهي كما أوضحه شراح الجامع الصغير؛ لأن فيه وظائف فلعله إذا صام ضعف عن فعلها."

(‌‌كتاب الصوم،ج:2،ص:375،ط:سعید)

"زادالمعاد فی ھدی خیرالعباد"میں ہے:

"وذكر جرير عن مغيرة عن إبراهيم أنهم كرهوا صوم الجمعة ليتقَوَّوْا على الصلاة.

قلت: المآخذ في كراهته ثلاثة، هذا أحدها. ولكن يشكل عليه زوال الكراهية بضمِّ يوم قبله أو يوم بعده إليه.

والثاني:

أنه يوم عيد، وهو الذي أشار إليه النبي - صلى الله عليه وسلم."

والمأخذ الثالث:

حماية الذريعة من أن يُلحق بالدِّين ما ليس منه ويُوجِب التشبُّه بأهل الكتاب في تخصيص بعض الأيام بالتجرُّد عن الأعمال الدنيوية. وينضمُّ إلى هذا المعنى: أنَّ هذا اليوم لما كان ظاهر الفضل على الأيام كان الداعي إلى صومه قويًّا، فهو في مظِنَّةِ تتابعِ الناس في صومه واحتفالهم به ما لا يحتفلون بصوم يومٍ غيره. وفي ذلك إلحاق بالشرع ما ليس منه."