سوال

کیا  ہر نماز کے  وقت  پچھلی قضا نماز پڑھ سکتے ہیں؟

جواب

ہر  نماز کے وقت میں قضا  شدہ نمازوں میں سے نمازیں پڑھی جا سکتی ہیں، لیکن فجر اور عصر کی نماز کے بعد   چوں کہ سنتیں اور نوافل نہیں ہوتیں،  اس لیے ان نمازوں کے بعد اگر قضا  نمازیں ادا کرنی ہوں تو تنہائی میں قضا  نمازیں ادا کریں، تاکہ لوگوں کے سامنے نماز کے ترک کا اظہار نہ ہو۔

اسی طرح اگر کسی شخص کی ایک وقت کی کوئی نماز قضا  ہو گئی ہو تو   وقتی نماز کے ساتھ اُس سے پہلے والے وقت کی نماز بھی قضا  کی جا سکتی ہے۔

بس ملحوظ رہے کہ  طلوعِ آفتاب، عین زوالِ آفتاب اور عصر کی نماز کا آخری وقت جب سورج زردی مائل ہوجاتا ہے، اُس وقت سے لے کر غروبِ آفتاب کے  دوران قضا نماز ادا کرنے کی اجازت نہیں۔ اسی طرح یہ بھی یاد رہے کہ اگر قضا نمازوں کی تعداد چھ سے کم ہو تو وقتی نماز سے پہلے ان کی قضا ضروری ہوگی، الا یہ وقتی نماز کا وقت کم ہو، یا قضا نماز بھول کر وقتی نماز ادا کرلے۔

الدر المختار شرح تنوير الأبصار وجامع البحار (ص: 97)

"وجميع أوقات العمر وقت القضاء إلا الثلاثة المنهية."

فقط واللہ اعلم