سوال

میں اپنے شوہر سے خلع لے رہی ہوں، میرا اس سے پچھلے 5 مہینے سے کوئی تعلق نہیں ہے، میرا کیس عدالت میں چل رہا ہے، اب اس صورت میں کیا مجھے عدت کرنی ہوگی یا نہیں؟ خلع کا فیصلہ شوہر کے دھوکا  دینے اور ذہنی اذیت دینے کی وجہ سے کیا ہے۔

جواب

اگر آپ اپنے شوہر سے خلع لے رہی ہیں تو آپ پر خلع واقع ہو جانے کے بعد عدت گزارنا لازم ہو گا اور آپ  کی عدت اُس دن شروع ہو گی جس دن خلع واقع ہو گا، اور خلع   واقع ہونے کے لیے ضروری ہے کہ آپ کا شوہر زبانی طور پر یا تحریری طور پر یا خلع کے کاغذات پر دستخط کر کے آپ کو خلع دے دے، پھر خلع واقع ہو جانے کے بعد آپ پر عدت گزارنا لازم ہو گا، اگرچہ آپ دونوں کا پانچ ماہ سے کوئی تعلق نہیں۔ اگر شوہر کی رضامندی یا قبول کیے بغیر یک طرفہ خلع کی ڈگری جاری کی گئی تو شرعًا خلع واقع نہیں ہوگا۔

عدت کی مدّت تین ماہواری ہو گی  اگر حمل نہ ہو، اگر حمل ہو تو وضعِ حمل پر عدت ختم ہو جائے گی۔ فقط واللہ اعلم