سوال

 میرا سوال یہ ہے کہ کسی اور شخص کی زمین میں خود بخود اگنے والے چھوٹے پودے مالک زمین کی اجازت کے بغیر کوئی دوسرا شخص اکھاڑ کر اپنی زمین میں لگا سکتا ہے؟کیا یہ خودرو پودے خودرو گھاس کے حکم میں آتے ہیں؟

جواب

صورت مسئولہ میں مملوکہ زمین میں خود رو پودے مالک زمین کی ملکیت شمار ہوں گے، مالک کی اجازت کے بغیر کسی اور کے لیے اکھاڑنا جائز نہیں ہے۔ البتہ اجازت کے لیے اتنا کافی ہے کہ مالک کو پودے اکھاڑنے کا علم ہواور وہ منع نہ کرے تو جائز ہے۔

حدیث شریف میں ہے:

"قال رسول الله صلى الله عليه وسلم: ’’ألا لاتظلموا ألا ‌لا ‌يحل ‌مال امرئ إلا بطيب نفس منه ‘‘. رواه البيهقي في شعب الإيمان والدارقطني في المجتبى."

(مشکوٰۃ المصابیح، باب الغصب والعاریة، الفصل الثانی، ج: ۲، ص: ۸۸۹، رقم الحدیث: حدیث: 2946، ج:2، ص:889،  ط:المكتب الإسلامي - بيروت)

فقط واللہ اعلم