سوال

آج کل جو  خضاب اور  مہندی کے نام پر بک رہا ہے،  جیسا کہ حنا وغیرہ، اس کو استعمال کرنا کب جائز ہے ؟

جواب

داڑھی  اور  سر کے بالوں کو  رنگنا  کسی بھی عمر میں جائز ہے، البتہ خالص کالے رنگ کاخضاب لگاناجائز نہیں  ہے، احادیثِ  مبارکہ میں اس کی ممانعت اور سخت وعیدآئی ہے،  صرف حالتِ  جہاد میں دشمن کو مرعوب رکھنے اور اس کے  سامنے  جوانی اور طاقت کے اظہار کے لیے کالا خضاب استعمال کرنے کی  اجازت دی گئی ہے۔ ابوداودشریف کی روایت میں ہے: ’’حضرت عبداللہ بن عباس رضی اللہ عنہماارشادفرماتے ہیں: جناب نبی کریم صلی اللہ علیہ وسلم نے فرمایا:آخری زمانہ میں کچھ لوگ ہوں گے جوسیاہ خضاب لگائیں گے،جیسے کبوترکاسینہ،ان لوگوں کوجنت کی خوش بوبھی نصیب نہ ہوگی‘‘۔

لہٰذا خالص کالے رنگ کے علاوہ دیگر رنگوں کا خضاب لگانا جائز ہے۔ یہی حکم آج کل بازار میں دست یاب بالوں کے  جدید کلر (رنگ)  کا بھی ہے یعنی خالص سیاہ (کالا) کلر  بالوں پر لگاناتو جائز نہیں ہے، البتہ  کالے رنگ کے  علاوہ دوسرے کلر مثلاً خالص براؤن ،  سیاہی مائل براؤن یا سرخ(لال) کلر لگانا جائز ہے۔ 

 عموماً جو کلر استعمال ہوتے ہیں (خواہ مہندی ہو یا کوئی جدید کیمیکل سے بنا رنگ) وہ دھونے کے بعد بالوں تک پانی پہنچنے سے مانع نہیں ہوتے، اس لیے ایسے خضاب سے رنگ آنے کے بعد وضو اور غسل ہوجائے گا۔ البتہ جس وقت مہندی وغیرہ  سر یا داڑھی کے بالوں میں لگی ہوئی ہو اور وہ خشک ہو کر جمی ہوئی ہو (یعنی اس کی تہہ موجود ہو) جو پانی پہنچنے سے مانع ہو تو اس حالت میں وضو اور غسل (فرض) نہیں ہوگا، اسے چھڑا کر وضو یا غسل کرنا ہوگا۔ اور اگر کوئی جدید کلر ایسا آجائے جسے لگانے کے بعد مستقل اس کی تہہ جم جاتی ہو دھونے سے بھی نہ ہٹتی ہو اور باقاعدہ تہہ محسوس بھی ہوتی ہو اور پانی پہنچنے سے مانع بھی ہو تو اسے لگاکر وضو اور غسل (فرض) ادا نہیں ہوگا۔
سنن النسائي (8/ 138):

" أخبرنا عبد الرحمن بن عبيد الله الحلبي، عن عبيد الله وهو ابن عمرو، عن عبد الكريم، عن سعيد بن جبير، عن ابن عباس، رفعه أنه قال: «قوم يخضبون بهذا السواد آخر الزمان كحواصل الحمام، لايريحون رائحة الجنة»".

صحيح مسلم (3/ 1663):

" وحدثني أبو الطاهر، أخبرنا عبد الله بن وهب، عن ابن جريج، عن أبي الزبير، عن جابر بن عبد الله، قال: أتي بأبي قحافة يوم فتح مكة ورأسه ولحيته كالثغامة بياضاً، فقال رسول الله صلى الله عليه وسلم: «غيروا هذا بشيء، واجتنبوا السواد»".

الفتاوى الهندية (5/ 359):

"اتفق المشايخ رحمهم الله تعالى أن الخضاب في حق الرجال بالحمرة سنة، و أنه من سيماء المسلمين و علاماتهم، و أما الخضاب بالسواد فمن فعل ذلك من الغزاة؛ ليكون أهيب في عين العدو فهو محمود منه، اتفق عليه المشايخ رحمهم الله تعالى. و من فعل ذلك ليزين نفسه للنساء و ليحبب نفسه إليهن فذلك مكروه، وعليه عامة المشايخ."

فقط واللہ اعلم