سوال

کراچی جہازمیں مرنے والا شہید ہیں۔مہربانی تفصیل سے بتائیں؟

جواب

 شہید  کی دو قسمیں ہیں:حقیقی اور حکمی۔

حقیقی شہید وہ کہلاتا ہے جس پر شہید کے دنیوی اَحکام لاگو ہوتے ہیں  کہ اس کو غسل وکفن نہیں دیا جائے گا اور جنازہ پڑھ کر ان ہی کپڑوں میں دفن کر دیا جائے جن  میں شہید ہوا ہے، مثلاً اللہ کے راستہ میں شہید ہونے والا، یا کسی کے ہاتھ ناحق قتل ہونے والا،  بشرطیکہ وہ بغیر علاج معالجہ اور وصیت وغیرہ موقع پر ہی دم توڑجائے۔

اور حکمی شہید وہ کہلاتا ہے، جس کے بارے میں احادیث میں شہادت کی بشارت وارد ہوئی ہو، ایسا شخص آخرت میں تو شہیدوں کی فہرست میں شمار کیا جائے گا، البتہ دنیا میں اس پر عام میتوں والے اَحکام جاری ہوں گے،  یعنی اس کو غسل دیا جائے گا اور کفن بھی پہنایا جائے گا۔

متفرق احادیث میں ایسے شہداء کی چالیس سے زیادہ قسمیں مذکور ہیں، ان سب احادیث کو جمع کرنے کے لیے علماء محققین نے مختلف رسالے تالیف کیے ہیں، علامہ ابن عابدین شامی رحمہ اللہ نے ان تحقیقات کا خلاصہ  حاشیہ رد المحتار میں نقل کیا ہے،، جس کا لب لباب ڈاکٹر عبدالحئی عارفی رحمہ اللہ نے اپنی کتاب ’’احکامِ میت‘‘  میں ذکر کیا ہے۔

ان اقسام کی روشنی میں کراچی جہاز حادثہ میں انتقال کرجانے والے کئی وجوہ سے حکمی اور اخروی شہید ہیں، اس لیے آگ میں جل کر مرنے والے، کسی دیوار یا عمارت کے نیچے دب کر مرنے والے، جمعہ کے دن وفات پانے والے، مسافر اور دیار غیر میں مرنے والے  شہید کے حکم میں ہوتے ہیں۔ (فتاوی شامی، 2/252، 253،  باب الشہید، ط: سعید)  فقط واللہ اعلم